Hai ocasións nas que a degustación dun menú do día se converte nunha experiencia. É o que che pode suceder se visitas o restaurante Avenida de Escairón (O Saviñao), todo un símbolo da cociña caseira.

A xefa do establecemento é Pura Expósito, que aos seus 85 anos segue á fronte dos fogóns e controla a finca que abastece de produtos frescos ao negocio, case todos agás o polbo e os peixes.

Historia e tradición familiar

CONTENIDO PATROCINADO

Salado Golf & Beach Resort

Descubre la oportunidad de inversión más exclusiva del Caribe. Villas de lujo con retorno garantizado del 12% anual en Punta Cana.

Conoce más →

Pura é unha cociñeira de toda a vida, que herdou o oficio do seu pai e tivo á súa nai como mestra da repostaría.

Abriu o Avenida xunto ao seu marido, Ramón Vázquez, como cafetería e sala de festas en 1966 e reconvertérono en casa de comidas en 1970.

Finado o seu esposo, agora traballa man a man co seu fillo Milucho Vázquez, que rexe a sala de concertos situada na parte posterior do edificio, pero esa é outra historia.

Especialidades da casa

No Avenida pódese probar un 'caldo de gloria', como diría Rosalía, pero neste caso feito con grilas, os brotes da col, dun sabor moi fino.

"Plantei máis de 800 coles para os caldos", comenta Pura.

Entre as opcións de segundo prato inclineime polo lacón con chourizo e grelos, moi apetitoso, pero sorprendeume que as grilas estivesen máis tenras ca os grelos.

Os chourizos tamén estaban de dez, polo que non é de estrañar que o cocido sexa unha das insignias deste restaurante pola calidade dos seus ingredientes.

Sérveno todos os domingos ata ben entrado o mes de abril, cando lle cede protagonismo ao cordeiro asado e aos callos no menú dominical.

O cocido adoita levar chourizos ceboleiros, tradicionais na zona, aos que Pura lles adoita botar algo máis de picante ca aos convencionais.

O capón é outra das delicias da casa, sen esquecer os polos. Adoita prepararse por encarga, do mesmo xeito que o bacallau á portuguesa ou á galega.

O mesmo sucede co polbo, pídese moito os días de feira na localidade, o 8 e o 19, datas nas que tamén se fan os callos.

A cociñeira prepara unha saborosa empanada caseira de liscos e chourizo, que se adoita servir os sábados.

Produtos frescos e pratos destacados

Se os ovos con chourizo do Avenida teñen moitos seguidores, outro dos clásicos da casa e do menú son as febras, que aquí se fan con xamón, pois a cociñeira entende que son máis ricas ca as de lombo.

O segredo radica en usar un bo produto e na súa preparación para evitar que se endurezan. "Piden máis febras ca filetes de tenreira", asegura Pura Vázquez.

Chegada a tempada paga a pena probar os tomates. Son pezas de gran peso, entre os 800 gramos e o quilo, que xa foron obxecto de algún reportaxe xornalístico polo seu tamaño.

Abonda con catro rodelas, aderezadas con herbas e queixo relado, para encher o prato. Pura Expósito plantou este ano 150 plantas de distintas variedades para abastecer o negocio.

Os pementos, sexan de Padrón ou italianos, son outra delicatessen.

Se o caldo é un clásico do menú do día, substituído ás veces pola fabada e as lentellas, nunca faltan as croquetas, de polo ou de xamón.

Elabóranas a man con anacos destas carnes, sen que se usen restos.

Sobremesas e viños locais

Entre as sobremesas caseiras destacan algunhas tan tradicionais como as peras ao viño, que aínda están máis ricas cando as fan con froita de produción propia.

Chama a atención o 'Tres leites', unha especie de flan con leite normal, condensada e nata, sen que se lle engada azucre.

Mención á parte merece a rosca de pan ou 'rosca da avoa', típica das celebracións de antano, coa súa base de fariña e lévedo, á que a cociñeira lle engade un pouco de anís para despois cubrir a parte superior da masa con ovo e azucre para darlle un toque torrado.

A torta de améndoa é outra das especialidades de Pura, do mesmo xeito que os biscoitos que fai case todas as noites e que pasan de mesa en mesa.

Levan pouco azucre e moitos comensais acompáñanos con queixo do país.

O Avenida, aínda que ten marcas de chateo de varias denominacións, aposta polos viños de O Saviñao, como o Abadía da Cova e o Viña Vella, que ten un godello moi logrado.