Drones ao servizo do medio rural

A mancomunidade fomenta o manexo de drones no medio rural. / Iñaki Abella

«Agricultura de Precisión aplicada con Sistemas Aéreos Non Tripulados e Ortofotografía». Este é o título dun novo ciclo de formación da Mancomunidade do Salnés ao abeiro do seu Programa Integrado de Emprego.

Unha aposta polo manexo dos drones e a súa aplicación no ámbito rural tanto para combater o estrés hídrico como para aplicar tratamentos fitosanitarios.

Tamén permite avaliar o estado de todo tipo de plantacións ou obter cartografía aérea de alta precisión, entre outras moitas funcións.

Formación en tecnoloxía agrícola

Dez alumnos participan desta experiencia, presentada en Meis e provista de corenta horas de formación teórico-práctica.

Isto lles permite «aprender a capturar e procesar datos multiespectrais, xerar mapas de prescripción e realizar aplicacións variables de fertilizantes e fitosanitarios».

Participantes no curso. / Iñaki Abella

Profesionalización do medio rural

Deste modo o órgano supramunicipal incide na súa aposta por «dotar o medio rural de profesionais cualificados capaces de integrar tecnoloxía avanzada na xestión agrícola».

Isto inclúe operadores de drones agrícolas, técnicos en agricultura dixital, asesores en xestión integrada de pragas, responsables de tratamentos aéreos ou prestadores de servizos tecnolóxicos para cooperativas e explotacións».

Optimización e sostibilidade

Ademais de destacar o eido formativo e o obxectivo laboral deste curso, a Mancomunidade do Salnés resalta que con el se incide na «optimización de recursos, o aforro de auga e fitosanitarios, a mellora da produtividade e a sostibilidade ambiental».

A demostración realizada en Meis. / Iñaki Abella

En boa lóxica, isto contribúe a «reforzar a competitividade do sector agrícola» e a «impulsar a fixación de poboación no medio rural e a súa transformación dixital».

Especialización en ortofotografía con dron

En relación co curso de ortofotografía con dron, cómpre engadir que o órgano supramunicipal sostén que ofrece formación especializada para capacitar profesionais na captura, procesamento e interpretación de imaxes aéreas xeorreferenciadas.

Os alumnos aprenden a «planificar voos fotogramétricos, configurar parámetros como altitude, solape e resolución, e xerar ortomosaicos de alta precisión mediante software especializado».