Un momento do acto institucional do Día da Muller en Vilagarcía. / Iñaki Abella
O Día Internacional da Muller conmemorouse onte na zona de Arousa coa lectura xeneralizada de manifestos, pero tamén con intervencións artísticas, musicais… E, sobre todo, coa presenza de centros educativos co propósito de concienciar ás novas xeracións na necesidade de seguir reclamando unha igualdade real.
En Vilagarcía, o Concello leu o texto aprobado pola Fegamp e que pon o acento nas mulleres como «xestoras transformadoras dos seus pobos e cidades», que «dende os espazos de responsabilidade, e tamén dende os equipos técnicos, sosteñen a administración local e participan nos procesos máis esixentes que afrontan hoxe os gobernos máis próximos á cidadanía», como leu a exconcelleira de Igualdade, Victoria Hierro.
Ela foi a encargada de dirixirse ás persoas presentes na praza de Ravella onde os mozos instrumentistas Daira Portas, Iria Caamaño, Adriana Diéguez e Jorge Ortal puxeron música ao acto.
Nesta ocasión, reivindicouse este papel tras uns tempos de verdadeiro reto para as administracións ante a xestión dos fondos europeos Next Generation; dunha dimensión e esixencia técnica á que «nunca antes se tiveron que enfrontar» e que, en Galicia, «unha parte moi significativa desta responsabilidade recae en mulleres».
A exconcelleira Victoria Hierro na lectura de Vilagarcía. / Iñaki Abella
A vilagarciá, que estivo arroupada por concelleiros de goberno e oposición, puxo en valor o papel desempeñado dende a primeira alcaldesa elixida democraticamente en Galicia, Maruja Gómez, en 1936, ata o día de hoxe, cando «máis do 42% das concellarías nos municipios galegos están ocupadas por unha muller, a pesar de que só o 22% son alcaldesas». Mesmo na zona do Salnés e o Ullán vese esta proporcionalidade; de 12, só hai dúas rexedores: Maite Tocino en Pontecesures e Marta Giráldez en Meis.
Nesta última localidade leuse un manifesto para cada centro escolar e Amelie Trotet ofreceu o espectáculo feminista «O xermolo do latexo». Ademais, deuse a coñecer a persoa gañadora do cartel anunciador deste ano; un deseño do alumnado de San Tomé do CRA.
Non faltaron actos en concellos veciños, como Cambados, que reuniu 400 nenos e nenas na praza do Concello baixo o lema «Ao coidado do futuro» e que, ademais, contou coa voz da mocidade mediante un manifesto elaborado por dúas alumnas do IES Asorey.
Lectura do manifesto en Meis. / Cedida
A Concellería de Igualdade puxo autobuses para facilitar a asistencia de todos os colexios e cada un realizou unha posta en escena para amosar como diferentes personalidades tiveron que abrirse camiño na historia pola súa condición de xénero; para reivindicar, con pancartas, situacións que aínda están en desigualdade… E ademais do reparto de material, a Escola de Música e Conservatorio deleitaron ás persoas asistentes con varias pezas. O CIM comarcal tamén se sumou a esta cita, pois ten nesta vila a súa sede.
E os actos continúan durante a fin de semana e máis alá, pois moitos concellos esténdenos a todo o mes. Os máis inmediatos, para hoxe, son a cea de confraternidade de homenaxe ás veciñas que este ano acceden á xubilación que organiza o Concello de Meaño.
