O Concello de Cervo comprométese a asumir boa parte do impacto que implica o incremento de prezos da residencia municipal, unha medida que contribuirá a aliviar a carga económica dos usuarios e das súas familias.
Isto é posible polos bos resultados da liquidación da conta orzamentaria de 2025, que os técnicos municipais confirmaron a última hora da mañá de onte á alcaldesa, Dolores García Caramés, quen destaca que isto é froito "da vontade política do goberno".
Protestas pola suba de tarifas
A comunicación chegaba cando a media tarde unhas 200 persoas se concentraban diante da residencia de San Cibrao para protestar pola suba de tarifas do 37% anunciada nos pasados días ao considerar que golpea ás familias e impide que leven aos seus maiores ao xeriátrico.
Exhibiron pancartas comparando a tarifa cun hotel de cinco estrelas e indicando que "o Concello de Cervo descoida os nosos maiores".
Compromiso municipal e xestión económica
O comunicado indicaba que o remanente positivo permite aproveitar eses fondos de tesouraría para incrementar a achega do Concello ao centro de atención ás persoas maiores.
A alcaldesa reafirma así o seu compromiso constante na procura de solucións que posibiliten unha redución do custo das prazas aos usuarios e sinala que a liquidación confirmada polo equipo técnico económico, "froito dunha xestión equilibrada e sostible da facenda local, permite agora incrementar o apoio municipal á residencia".
Medidas para reducir o custo e diálogo coas familias
Este paso, que se formalizará en pleno a finais da vindeira semana, "baixo a fórmula xurídica adecuada, confirma o traballo do goberno local por promover medidas destinadas a reducir custos e facilitar o acceso a servizos públicos esenciais para os seus veciños, tal e como se comprometeu.
García Caramés lembra que se reuniu coas familias a semana pasada e lles comunicou que estudaba fórmulas para abaratar o custo das prazas, pero que necesitaba tempo "xa que o Concello está sometido a un plan económico financeiro durante dous anos.
Cinco días despois temos a solución enriba da mesa. Agradezo a paciencia de usuarios e familiares".
Caramés volverá reunirse coa empresa o luns para coñecer prazos e agarda saber en concreto canto pode achegar o Concello.
O martes prevé outra reunión cos familiares para avanzarllo.
Reaccións políticas e demandas á Deputación
En cambio, a rexedora lamenta o silencio da Deputación, administración á que solicitou axuda e que "non foi quen de confirmar ningún apoio, mentres esa mesma institución anuncia que asumirá o cen por cen dos custos das residencias doutros concellos lucenses".
Caramés asegura que insistirá para que se concrete esa axuda provincial.
A alcaldesa tamén está decepcionada cos grupos da oposición (PSOE e BNG), que "quixeron facer do novo contrato da residencia un tema de conflito e de aproveitamento partidista".
Repróchalles que non fixesen fronte común para reclamar á Deputación axuda e que o BNG fale de "opacidade e escurantismo" cando a licitación leva meses nos portais públicos de contratación, "onde son accesibles os datos económicos, condicións e criterios", mentres o goberno "busca dar resposta ás demandas cidadás, mantendo a política social como un dos eixes da xestión municipal".
