Repostaxe de gasolina / Pixabay

A escalada do conflito entre Irán, EE.UU. e Israel disparou o risco dunha interrupción do subministro de petróleo polo bloqueo do Estreito de Ormuz, unha ruta pola que pasa preto do 20 % do cru que se comercializa por vía marítima. Esa ameaza fixo que o prezo do petróleo subise con forza e, polo tanto, tamén o custo na repostaxe da gasolina e o diésel nas estacións de servizo.

Coa perspectiva de pagar máis por cada litro, convén ter en conta hábitos e técnicas de condución que realmente axuden a reducir o consumo de combustible. Aquí tes os consellos máis efectivos, explicados de forma clara para que os poidas aplicar xa mesmo.

Acelerar e frear de forma constante e brusca dispara o consumo. Un manexo do vehículo máis suave permite ao motor traballar cunha menor demanda de potencia e reduce o gasto de combustible. Do mesmo xeito, anticipar as sinais, mirar máis alá do vehículo que te precede e evitar aceleracións e desaceleracións innecesarias pode supoñer un aforro considerable en cada traxecto.

Para aforrar combustible hai que conducir suave e amodo / Pixabay

A resistencia aerodinámica medra coa velocidade, polo tanto, canto máis rápido vas, máis gasolina consumes. En autoestradas hai que ir a unha velocidade estable e moderada. Isto pode mellorar significativamente a eficiencia do teu coche.

Conducir en marchas altas a baixas revolucións, sen forzar o motor, axuda a que a combustión sexa máis económica, sempre e cando non se leve ao extremo e levemos o coche ‘afogado’.

Subir de marcha a tempo, sen ‘matar’ o motor nin levalo ao límite, reduce o consumo.

Deixar o motor en marcha nun atasco durante varios minutos consume un combustible innecesario. Segundo os estudos, se vas estar parado máis dun minuto, o aconsellable para aforrar gasolina é apagar o motor.

Levar unha presión inadecuada nos pneumáticos aumenta a resistencia á rodaxe e, polo tanto, o consumo. Por tanto, manter a presión recomendada polo fabricante non só é máis seguro, senón que tamén eleva a eficiencia. Revisa periodicamente a presión e o aliñamento das rodas para evitar un gasto extra de combustible.

Calquera quilo extra no coche e calquera elemento que empeore a aerodinámica (barras de teito, cofres, equipamento voluminoso, etc.) obriga o motor a traballar máis, e polo tanto a elevar o consumo de combustible.

Para aforrar gasolina hai que evitar grandes cargas no coche / Pixabay

Evitar atascos e facer quilómetros de máis axuda a gastar menos combustible. As apps de navegación que incorporan tráfico en tempo real poden axudarche a escoller rutas máis eficientes e, sobre todo, cando se escolle esta configuración.

Un motor ben atendido, cos filtros de aire limpos e demais compoñentes en bo estado melloran a eficiencia global. O mantemento ao día non só evita avarías, tamén asegura que o teu coche non estea consumindo máis combustible do necesario.

Un bo mantemento do coche é esencial para reducir os consumos / Pixabay

A climatización é dos factores que máis pode variar o consumo de combustible. A baixas velocidades pode ser máis eficiente optar pola ventilación natural. É dicir, levar as xanelas baixadas na cidade no verán. Mentres que a velocidades máis altas, o aire acondicionado é a miúdo máis eficiente que as xanelas abertas porque reduce a resistencia aerodinámica. E tanto no verán como no inverno manter unha temperatura constante que ronde os 22 graos.

Calefacción de asentos, luces de alto consumo ou aparellos conectados ao acendedor supoñen unha carga extra para o motor e, en consecuencia, máis consumo de combustible. Usalos con moderación tamén axuda a conter o gasto total.

Combinando hábitos de condución eficientes, un bo mantemento do vehículo e unha planificación intelixente de cada viaxe, podes reducir moito o consumo de combustible e facer fronte así á suba do prezo da gasolina polo conflito de Irán e o peche do estreito de Ormuz, aínda que é un consello que se debe manter no tempo para gastar menos e reducir as emisións contaminantes.