Un momento da visita de técnicos de Costas, onte, a Praia América e Panxón.
Agora é o momento das reparacións urxentes para restituír servizos e axudar á area a volver ao seu sitio, pero os estragos provocados pola última cadea de borrascas en comuñón coas mareas vivas levan ao departamento estatal de Costas a exporse medidas a longo prazo para protexer Praia América dos embates do cambio climático.
O departamento estatal pon en marcha un estudo de alternativas para tratar de alongar a vida do principal areal nigranés e contempla, entre outras, eliminar algunhas das zonas de aparcadoiro actuais e tramos do paseo existente. Para que? Para permitir que as dunas medren e sirvan de protección ao espazo costeiro.
Así o expuxeron onte o propio director do Servizo Provincial de Costas, Miguel García, e técnicos do organismo durante unha visita ao areal para comprobar os danos causados polos temporais do comezo do ano. As dunas de Gaifar quedaron arrasadas e os estragos estendéronse ás pasarelas de madeira para acceder á area, ás duchas e a boa parte da varanda do paseo e o seu pavimento.
O Ministerio para a Transición Ecolóxica e o Reto Demográfico destinará 220.000 euros ás reparacións e a traballos como grandes movementos de terras que contribúan a rexenerar máis rapidamente o ecosistema dunar e evitar que continúe acelerándose a erosión. Reporanse ademais os accesos peonís á praia e redeseñarase a gran pasarela de madeira de Praia América, pechada polos estragos. A licitación dos traballos realizarase nas vindeiras semanas por urxencia coa intención de desenvolvelos en abril, de xeito que o areal estea listo antes da tempada de baño.
A intervención de Costas non inclúe o paseo marítimo de Panxón, cuxas varandas levou o oleaxe, ademais de lousas e cascallos. Será o Concello de Nigrán o que se ocupe de resolver estes danos con fondos propios en canto sexa posible, confirma o alcalde.
González agradece a Costas a rápida resposta e o interese por pensar no problema a longo prazo. «Plantexannos a posibilidade de realizar un estudo sempre que nós esteamos dispostos a asumir medidas que poden ser complicadas como retirar aparcadoiros, tramos de paseo… Nós estamos dispostos a escoitar porque senón imos deixar un futuro moi negro para Praia América», sinala.
Serán actuacións que implicarán cambios no Plan Especial de Ordenación do Litoral no termo municipal de Nigrán para avanzar no deslinde marítimo-terrestre co obxectivo de que o espazo dunar medre a cambio de buscar alternativas de aparcadoiro.
Ambas administracións acordaron ademais que Costas avalíe o desprendemento de terra de Monte Lourido para buscar tamén nesa zona a mellor solución de rexeneración.
