O pleno de Curtis deu luz verde, cos votos a favor do PP e a abstención do BNG, aos orzamentos municipais para 2026. Acadarán os 7.905.715,57 euros, un 23% máis ca no pasado ano, e neles multiplícanse as contías de diversas partidas, desde as dos ingresos ata as de investimentos reais.
Investimentos en infraestruturas e deporte
Neste último caso acaparan máis de 1,1 millóns, é dicir, un 122% máis, que irán á mellora da rede viaria, especialmente tras as consecuencias das inclemencias meteorolóxicas, ou á ampliación do abastecemento en zonas xa comprometidas, entre outras obras.
Aumenta tamén a partida para deporte e instalacións. Aglutina case 660.000 euros, dos cales 360.000 levaranos cadansúa actuación de ampliación nos ximnasios, primeiro no de Teixeiro, cuxo proxecto está rematado, e logo no de Curtis.
Gasto social e servizos básicos
A maior partida vai dirixida a gasto social, que acapara un millón e medio de euros.
Con todo, o maior anaco da tarta é, como acontece na maior parte dos pequenos concellos, para gasto social. A través desta área, para a que se contemplan 1,5 millóns de euros —o 17,22% do total—, fináncianse servizos como o de Axuda no Fogar (SAF), con 600.000 euros, o centro de día ou un contrato externalizado, por valor de 300.000, tamén de axuda a domicilio.
Así mesmo, no que atinxe ao gasto corrente, o que blinda servizos básicos ou a promoción do comercio local e a cultura, medra un 10,89%, uns 324.000 euros.
Impulso á cultura e feiras locais
Neste ámbito contémplanse 421.000 para actividades culturais e museos e un grande impulso ás feiras de Teixeiro e Curtis para convertelas "nun atractivo turístico e comercial en beneficio do comercio e da hostalaría local".
O alcalde, o popular Javier Caínzos, detalla que este ano se realizarán estudos das dúas feiras para, en base aos resultados que dean, deseñar campañas de captación de novos vendedores e postos e poñer en marcha accións coas que fortalecelas, "especialmente a de Teixeiro, unha feira con máis de cen anos que precisa dunha revitalización", mentres que a de Curtis "está bastante asentada xa".
Aumento de ingresos e transferencias
O aumento dos orzamentos débese, en boa medida, ao gran incremento que experimentará a recadación por impostos directos. Medra nun 157% grazas, fundamentalmente, a tres proxectos industriais cuxos trámites de obtención de licenza están xa na súa recta final.
Ademais, a previsión de transferencias de capital doutras administracións ascende nun 134,89%, "o que demostra a capacidade do equipo de goberno para negociar", indica Caínzos, que sostén que estas son unhas contas "baseadas en datos reais, austeras e prudentes".
