Multitudinaria xornada relixiosa na vila
A localidade de Cangas celebrou o pasado Venres de Dolores unha xornada marcada pola devoción e a tradición, con unha notable participación veciñal nos actos programados.
A celebración arrancou pola mañá cun concerto no atrio da igrexa, posible grazas a unha climatoloxía favorable. Ao mediodía, a Banda de Música Bellas Artes de Cangas congregou numerosos asistentes e ofreceu un repertorio vinculado ao tempo pascual que foi ben recibido polo público.
Pola tarde, ás 19:00 horas, tivo lugar a misa solemne na excolexiata, que rexistrou unha destacada asistencia. Na homilía destacou a figura da Virxe María como símbolo de compaixón e fortaleza ante as dificultades que vive a Igrexa, e a cerimonia concluíu coa interpretación da coñecida secuencia Stabat Mater Dolorosa.
Como peche da xornada celebrouse a procesión da Virxe das Dores, unha imaxe datada en 1807 que percorreu as rúas de Cangas sobre un paso de palio. A talla, ataviada con coroa e vestiduras de gala, foi portada por unha trintena de homes e mulleres pertencentes á Venerable Irmandade da Santísima Virxe das Dores e Soidade de Cangas.
O conxunto procesional, iluminado por candelería e farois e adornado con abundante exorno floral, constituíu un dos momentos máis emotivos da xornada e foi seguido por un gran número de fieis que acompañaron á Dolorosa ao longo do percorrido.
O acto volveu poñer de manifesto o arraigamento desta tradición na vila e o compromiso de veciños e confrades por manter viva unha manifestación de fe e cultura transmitida de xeración en xeración.
Breve contexto histórico
A devoción ás Dores da Virxe ten a súa orixe no século XIII coa labor da Orde dos Servitas. En 1727 a Igrexa incorporou a festividade dos Sete Dores ao calendario no denominado Venres de Dolores, establecido como antesala da Semana Santa. Aínda que dita celebración foi suprimida do calendario litúrxico en 1969 tras o Concilio Vaticano II, a súa práctica mantívose en localidades como Cangas.
