Este exemplar podería remontarse aos tempos do nacemento do cristianismo. / turismo.ribeirasacra.org

Galicia é un dos recunchos da Península Ibérica con maior riqueza e diversidade no seu patrimonio natural.

Desde as Fragas do Eume ata a Ribeira Sacra, pasando por xardíns históricos e praias nas que o mar foi tallando a rocha ata crear piscinas e mesmo catedrais; as paisaxes galegas son todo un tesouro para as ciencias naturais.

Unha árbore milenaria en Lugo

Aínda que moitos xardíns galegos destacan por albergaren exemplares moi antigos no seu interior e mesmo contamos con bosques que nos amosan como era Galicia antes da chegada do home, nunha carballeira non moi coñecida de Lugo escóndese a árbore máis lonxeva de Galicia.

Falamos do Carballo grande de Cartelos, no concello de Carballedo.

O Carballo de Cartelos: un xigante de 2.000 anos

O Carballo de Cartelos é un carballo cuxa idade estimada ronda os 2.000 anos, o que non só o converte na árbore máis antiga de Galicia, senón que tamén sería unha das máis lonxevas de España xunto ao Teixo milenario de Jaén ou o 'Drago' de Tenerife.

Aínda que a afirmación poida parecer atrevida, a idade deste xigante lucense está avalada pola ciencia.

Os técnicos do daquela Instituto de Investigacións Forestais de Madrid realizaron unha intervención no tronco da árbore no ano 1967, extraendo unha mostra para analizar a súa idade e características.

Esta análise permitiu contabilizar uns 2.000 aneis de crecemento anual, o que sitúa a orixe do carballo nos tempos de Cristo.

O carballo de Cartelos podería ser unha das árbores máis lonxevas de España. / Concello de Carballedo

Un exemplar excepcional polas súas dimensións

Ademais da lonxevidade do exemplar, os investigadores catalogárono como un exemplar excepcional tamén polas súas dimensións.

A día de hoxe esta árbore da especie Quercus ruber L. ten uns 36 metros de altura e un diámetro de 3,6 metros, así como un peso estimado de 113 toneladas.

Dado o seu estado de conservación, a súa idade e as súas proporcións; os investigadores crían que podería tratarse dun exemplar único no mundo.