O Concello de Vilalba, a través da área de Infraestruturas Rurais, proxecta a creación dun centro de procesamento e transformación de mel na coñecida como escola de A Pedragosa, na parroquia de San Simón da Costa. O obxectivo desta iniciativa é que os produtores locais «poidan procesar de xeito totalmente gratuíto e sen necesidade de investimento» a produción das súas colmeas, tal e como explicou Modesto Renda. O vicealcalde, que presentou este mércores o proxecto ante integrantes da asociación de apicultura Serra da Carba, definiu esta iniciativa como «un ambicioso plan, centrado na rehabilitación total da escola da Pedragosa e que o Concello pretende converter nun moderno centro de transformación, coa instalación de maquinaria de última xeración». Engadiu que a proposta xurdiu dunha reunión coa agrupación de apicultores cando Vilalba Aberta estaba na oposición, na que lle falaron da posibilidade de facer en Vilalba algo semellante ao centro A Fusquenlla de Moeche. «Agora xurdiu unha liña de subvencións coa que non contabamos e tiñamos claro que este era o proxecto que tiñamos que presentar», explicou Renda en relación ao programa para proxectos de creación, mellora e ampliación de servizos básicos da Axencia Galega de Desenvolvemento Rural (Agader), que financiaría a totalidade da actuación, orzamentada en 38.700 euros. O presidente da asociación Serra da Carba, Iván Díaz, destacou que «na provincia non existe un centro destas características» e puxo en valor o que suporá «para as pequenas explotacións e xente que quere empezar». «É un sitio onde sacar o mel e facelo rápido e relativamente doado. E poder levalo ata envasado. Isto a nivel particular é moi difícil facelo, polo investimento que se precisa e porque necesitas sitio na casa. Oxalá cando empecei eu houbera un sitio así», recoñeceu. Outro membro da asociación apuntou que «non é só o aforro económico, senón o cooperativismo, que haxa alguén que che ensine a facelo ben». O novo centro de procesamento e transformación de mel incluirá unha desoperculadora automática, un madurador calefactable de 70 litros, un cerificador para 20 cadros, un extractor eléctrico, unha envasadora premium con soporte e un banco de decantación para o filtrado. Renda puxo en valor o aforro que supón para un apicultor particular dispor de xeito público destes aparellos, cuxo custo é de uns 11.000 euros. Ademais, instalarase un novo pavimento multicapa antideslizante e apto para industrias e un lavadoiro industrial. Tamén pintarase a zona de actuación, instalaranse luces led, mellorarase a accesibilidade do inmoble e a sinalización na contorna, e colocarase un aparcabicicletas, un colector de aceite usado e un punto verde de recollida de pilas, tapóns, lámpadas e equipos electrónicos. Rúa Ribadeo 5, Lugo • Tlfno: 982 29 81 00 • (Grupo El Progreso)