O presidente do TSXG con Azucena Recio González, nova presidenta da Sala do Contencioso-Administrativo do Alto tribunal galego. / Iago Lopez

O presidente do Tribunal Superior de Xustiza de Galicia (TSXG), Ignacio Picatoste, defendeu este venres na Coruña a independencia e o rigor da xudicatura nun momento marcado polas «incertezas» derivadas da nova organización xudicial.

Fixoo durante a toma de posesión de Azucena Recio González como presidenta da Sala do Contencioso-Administrativo do alto tribunal galego.

Defensa da independencia xudicial

Picatoste subliñou que, malia os cambios que introduce a nova lei, o proceso debe entenderse como «unha oportunidade para consolidar unha Xustiza máis eficiente, máis próxima á cidadanía e máis sólida na súa estrutura».

Fronte aos debates que acompañan a reforma da Lei de Eficiencia, reivindicou que o que realmente sostén o sistema xudicial é «a integridade, a capacidade de traballo e o compromiso das persoas que o serven».

Recoñecemento ao traballo da Sala

O presidente do TSXG destacou ademais o papel esencial da Sala do Contencioso-Administrativo, que en 2025 resolveu máis de 3.500 asuntos, unha media de 15 resolucións por día hábil.

«Detrás desa cifra hai estudo, deliberación, esforzo colectivo e unha dedicación constante para ofrecer respostas fundamentadas e en prazo», afirmou.

Traxectoria e obxectivos de Azucena Recio

Picatoste eloxiou a traxectoria de Recio, de quen destacou a súa «extraordinaria capacidade de traballo», a súa solvencia técnica e un liderado «sereno e eficaz».

Lembrou tamén a súa especialización en urbanismo, que a levou a resolver asuntos de «notable complexidade e relevancia social».

Na súa intervención, Azucena Recio asegurou asumir o cargo «con independencia, integridade, responsabilidade e sometemento á Lei e ao Dereito».

Reivindicou o papel de xuíces e xuízas como «última garantía dos dereitos das persoas» e subliñou que o seu nomeamento supón un recoñecemento «a todas as mulleres que traballan na Administración de Xustiza, así como ás que virán».

Avances en igualdade e novos retos

Lembrou que, cando naceu, as mulleres aínda non podían formar parte do Poder Xudicial, polo que considerou a súa designación un símbolo do avance acadado en igualdade.

Entre os seus obxectivos, situou a colaboración coa Sala de Goberno do TSXG e a súa participación na implantación da nova oficina xudicial, co fin de acadar «unha estrutura operativa que axilice a resolución dos procedementos».

Tamén destacou a importancia da transparencia para reforzar a confianza cidadá na obxectividade e imparcialidade da Xustiza.