O delegado territorial da Xunta en Lugo, Javier Arias, animou en Sarria ás asociacións de comerciantes a solicitar as subvencións do ente autonómico para dinamizar o sector. Están dotadas cun orzamento de 2,5 millóns de euros. Arias e a directora territorial da Consellería de Emprego, Comercio e Emigración, Carmen José López, reuníronse este mércores co presidente da Asociación de Comerciantes e Empresarios de Sarria (Aces), Ricardo Arias. O colectivo foi un dos beneficiarios desta liña de axudas en 2025, cando recibiu 20.500 euros. No conxunto da provincia concedéronse subvencións por 350.000 euros. Ademais do colectivo sarrián, beneficiáronse Acisa Ribadeo, CCA de Foz, CCU de Monforte, Centro Comercial Casco Histórico de Viveiro, a Asociación de Empresarios de Chantada e Sete Pontes de Vilalba. As entidades teñen ata o vindeiro día 12 de marzo para solicitar as axudas, destinadas a financiar campañas de fomento das vendas, accións de fidelización da clientela e actividades formativas para os asociados. Estas subvencións son para iniciativas «para potenciar o comercio de proximidade e axudarlles a manterse e progresar», destacou o delegado. Puxo de exemplo o outlet de inverno que celebrará este venres e sábado a Aces e que presentaron durante unha visita á mercería Sarillo. A iniciativa, cofinanciada pola Xunta, arrinca este venres en 33 negocios, nos que os clientes poderán desfrutar, tamén o sábado, de importantes descontos. Os participantes son: 1,2,3 Escondite Inglés, Atmósfera Sport, Barja Shoes, Cactus Rose, Calzados Gayoso, Calzados Veiga, Carpe Diem, Cris Abad, Decoracións Delux, Dimar, Duet, Géminis, Xoiaría Díaz, Lar de Menchu, Latas Pintura e Fogar, Os Soños de Uxía, mercería Dedal, Lucía, Sarillo, Micsport, Moncho, Ortopedia Sarria, Peregrinoteca, Pikaros Story, Sabrina, SD Kat, Senayo, Soños, Trece Táboas, Ultreia, Unika, Vilamey e Zaida. Rúa Ribadeo 5, Lugo • Tlfno: 982 29 81 00 • (Grupo El Progreso)