A protesta que se desenvolveu o martes fronte á Deputación así como a aprobación dunha moción de urxencia en apoio aos traballadores do Grupo de Emerxencias Supramunicipal (GES) de Cervo desenvolveuse sen que ninguén consultase nada no Concello nin cos seus responsables. A propia alcaldesa, Dolores García Caramés, asegurou estar «moi sorprendida» porque afirma que «foi algo que non esperaba e menos nos termos nos que se fixo». Refírese con iso a que se fixese mención a cuestións económicas «que eu nunca xamais puxen enriba da mesa cando decidín non renovar o convenio e polo tanto disolver o GES. De feito, o Concello asumiu a eses traballadores e seguimos pagándolles«. Di que ante esta situación o único que se lle ocorre pensar é que «na Deputación ninguén leu os escritos que enviei porque se non é que non ten ningunha explicación». García Caramés volveu insistir nos argumentos que fixo a finais de 2024 «cando xa dixen moi claramente que eu persoalmente, como alcaldesa, só asinaría a renovación do GES se me poñían diante un cadro de persoal con 18 efectivos, ou ben que funcionase durante doce horas, porque esas dúas son as únicas formas que hai de que se cumpra a lei. Porque lembro que se logo pasa algo, teño que asumir eu a responsabilidade, así que sempre me referín especificamente a eses dous aspectos, nunca ao económico, non entendo por que sacan agora o tema como escusa para protestar». Como exemplo das súas afirmacións, García Caramés lembrou que o Concello de Cervo comezou a xestión do GES cunha achega recoñecida de 23.000 euros «pero xa estabamos en máis de 100.000 euros, así que está moi claro que non era algo económico, pero supoño que será por conducir o debate cara a iso». Tamén dixo estar estrañada do posicionamento da Deputación «porque as competencias en materia de emerxencias para poboacións de menos de 20.000 habitantes son súas, así que é a propia Deputación a que ten que solucionar este problema». En todo caso, a alcaldesa subliña que a súa intención foi sempre «evitar calquera confrontación» e que está disposta a falar con quen faga falta «como fixemos sempre, por iso non comprendo que se fixese algo así sen tan sequera vir a falar antes con nós». Rúa Ribadeo 5, Lugo • Tlfno: 982 29 81 00 • (Grupo El Progreso)