Turismos circulan pola autoestrada. / | BERNABÉ/JAVIER LALÍN
A autoestrada Santiago-Alto de Santo Domingo pechou o pasado ano cun aumento do 4,9% no seu tráfico, practicamente en paralelo ao 5% da AP-9, e situouse entre as vías de peaxe que máis medran en España nun exercicio marcado por fortes avances en corredores con bonificacións moi ambiciosas ou gratuidade en determinados horarios. Nese contexto, a vía de alta capacidade que conecta a capital de Galicia e a comarca dezá consolidou unha evolución destacada e sumou ademais un escenario inédito: a incorporación por primeira vez de bonificacións para os seus usuarios.
A infraestrutura estatal xestionada por Autopista Central Galega (Acega) asinou durante o pasado curso un dos seus mellores comportamentos recentes ao elevar un 4,9% a súa intensidade media diaria respecto a 2024, segundo a comparación anual elaborada a partir da IMD mensual e a variación interanual de cada mes. O avance colócao na zona alta do ranking nacional de autoestradas de peaxe pero cun matiz relevante: o seu crecemento está practicamente calcado ao da AP-9, a gran referencia galega, da que apenas a separa unha décima.
Ese dato cobra valor ao poñelo en contexto co mapa estatal. As maiores subas concéntranse en vías moi condicionadas por políticas comerciais intensas ou por peaxes moi reducidos e incluso gratuidade nalgúns tramos horarios, como ocorre con varias radiais de Madrid. A clasificación encabézaa a AP-7 Circunvalación de Alicante, cun espectacular repunte do 42,8% (gratuita desde o ano pasado) seguida das radiais da capital de España Madrid-Navalcarnero, cun 18,6%; Madrid-Guadalaxara, cun 13,8%; Madrid-Toledo, cun 13,4% e Madrid-Ocaña, cun 13,1%. Non obstante, tampouco está en igualdade de condicións con outras autoestradas, pois gozan de exencións de pago en horarios nocturnos ou partes do día. Tamén sobresae a vía Alto das Pedrizas-Málaga, cun 11,9% (cómpre destacar que é gratuíta para vehículos lixeiros de 00.00 a 06.00 e para pesados, de 22.00 a 08.00). Fronte a esas cifras, a evolución da AP-53 resulta especialmente significativa porque consegue achegarse ao ritmo da AP-9 sen apoiarse nun escenario tan favorable como o doutras concesións que dispararon a súa demanda ao abeiro de descontos moi contundentes.
A comparación reforza a idea de que a AP-53 entrou nunha fase de crecemento sostido, acompasada coa gran arteria atlántica galega. Que o seu tráfico aumente practicamente o mesmo ca o da AP-9 sitúa a conexión entre Santiago e o Alto de Santo Domingo nunha posición rechamante dentro da rede estatal, sobre todo porque boa parte das autoestradas que máis medran fano impulsadas por esquemas de peaxe máis vantaxosos para os usuarios.
A ese comportamento súmase outra novidade relevante do pasado ano: a AP-53 incorporou por primeira vez bonificacións para os seus usuarios. Esa estrea abre un novo escenario para a autoestrada, que ata agora non contara con este tipo de incentivos e que encara o futuro co dobre argumento de ter gañado tráfico a un ritmo similar ao da AP-9 e de ter comezado a ensaiar unha política de descontos para fidelizar condutores.
A vía Santiago-Dozón rexistrou en 2025 unha evolución claramente á alza e pechou o ano cunha media de 7.652 vehículos diarios, uns 357 máis que en 2024, o que supón un novo máximo histórico de uso da autoestrada. O crecemento foi ademais máis intenso no tráfico pesado, que acadou unha media de 515 vehículos ao día, 38 máis que o ano anterior, cun avance do 8%. E todo isto, cómpre indicar, tendo en conta que as bonificacións non comezaron a aplicarse ata principios do mes de abril.
A circulación só floxeou en xaneiro e, a partir de aí, mantivo unha tendencia ascendente durante o resto do exercicio. O pico anual acadouse en agosto, con 9.078 vehículos diarios, mentres que o máximo de pesados se deu en outubro, con 571 ao día. Ademais, o último tramo do ano confirmou ese bo comportamento, con subas destacadas en setembro, outubro, novembro e decembro.
O balance do ano pasado deixa así unha imaxe de consolidación do tráfico nesta autoestrada, xa co efecto das bonificacións implantadas desde abril para os usuarios con telepeaxe, que inclúen a gratuidade da viaxe de volta en 24 horas e descontos adicionais para os condutores recorrentes. Para acollerse a elas é preciso que os vehículos dispoñan do sistema de telepeaxe.
O Ministerio de Transportes cifrou no seu momento en 2,9 millóns o aforro que supuxeron para os usuarios a aprobación dos descontos no transcurso do pasado ano.
