A dificultade de ser muller na música: romper o molde de 'rapazas que fan cancións'. / EFE
Leire Martínez, Zahara, Vicco, Alice Wonder, Ainhoa Buitrago e Aldhara reuníronse nunha charla este venres para compartir as súas experiencias na industria da música e as dificultades que atoparon por ser muller.
Falta de referentes femininos e estereotipos
No encontro, moderado por Martínez e organizado con motivo do Día da Muller, as convidadas puxeron de manifesto a falta de exemplos musicais femininos nos seus inicios como artistas.
"Os meus referentes eran Joaquín Sabina, Serrat, Aute…", enumerou Zahara, quen explicou que durante anos lle custou atopar modelos femininos que escribisen e defendesen as súas propias cancións.
"Daba igual a música que eu fixese, simplemente por ser muller xa estaba na categoría de 'rapazas que fan cancións cunha guitarra'", lamentou Zahara.
Presións e obstáculos na creación musical
Ainhoa Buitrago denunciou, por outra banda, que nalgúns momentos se lle propuxo "non ser tan específica" nas súas cancións dirixidas a mulleres e mesmo cambiar o xénero ao que se refería.
Aínda que celebrou que "houbo un montón de artistas que abriron moitísimo camiño" neste aspecto.
As poñentes estiveron de acordo en que son elas as que teñen a última palabra nos seus proxectos, pero Alice Wonder puntualizou que en moitas ocasións se "sentía superculpable polos gustos e as decisións que quería tomar".
"Isto ten que ver con ser muller claramente. Decisións que a outro nin lle discutirían, eu teño que repetilas 10 veces", comparou.
Neste sentido, Leire Martínez salientou a necesidade de "aprender que darte o teu lugar non vai da man de ir contra alguén ou por riba de alguén".
Manipulación e falta de transparencia na industria
Así mesmo, Zahara reclamou que nos seus inicios sufría "unha manipulación brutal" por parte das discográficas para transformar o seu proxecto en "algo que xa funcionara".
Isto levouna a sentirse "vulnerable, fráxil, incapaz de impoñerme". Incluso compartiu que o videoclip da súa canción máis coñecida, 'Con las ganas', estivo gardado durante un ano porque, segundo o selo discográfico, "non saía guapa".
Pola súa banda, Aldhara recoñeceu que resulta difícil "romper moldes, facerme soar", e confesa que procura educarse "para ter o maior coñecemento posible"; unha formación que, segundo Ainhoa Buitrago, non se esperaría dun home.
Zahara criticou a "falta de transparencia" nos contratos e nas negociacións, xa que a ela no seu primeiro selo mesmo lle recomendaron non ter mánager.
E Vicco exemplificou que nin sequera sabe "canto lle custa o meu proxecto á discográfica".
Buitrago apuntou que as compañías se benefician desta falta de información: "Á mínima que pides algunha explicación ou queres entender os orzamentos ou que algo cambie, es unha tía coa que é difícil traballar, es unha artista que dá moito a lata, es moi pesada", afirmou.
Presión estética e necesidade de cambio
As artistas tamén reclamaron as presións que existen na industria para encaixar nos cánones estéticos, "coma no instituto", comparou Vicco, ante o que Alice Wonder sinalou que "a imaxe da muller é máis limitante" na industria musical.
"Hai poucos proxectos arriba de todo que non estean cortados polo mesmo patrón", declarou Wonder, e plantexou que "é momento de traer novas cores á escena feminina".
