As confrarías e irmandades de Cangas deron a coñecer os seus novos estandartes, que lucirán por primeira vez durante a próxima Semana Santa mariñeira do Morrazo, unha das celebracións máis emblemáticas e singulares da comarca.
O acto de presentación, celebrado na excolexiata igrexa de Santiago de Cangas, reuniu representantes das distintas confrarías, autoridades locais e numerosos veciños, que quixeron acompañar este momento cargado de simbolismo e tradición.
Confraría do Cristo do Consuelo
Entre as novidades máis destacadas, a Confraría do Cristo do Consuelo presentou o novo estandarte que acompañará a procesión do Silencio do Venres Santo, correspondente á imaxe da advocación do Bo Xesús (s. XV, autor descoñecido). A peza sobresae pola súa coidada estética, na que, sobre un fondo azul, destaca unha grande cruz celta no centro, sobre un intenso fondo de cor laranxa, así como as chamas que a coroan, elementos que achegan forza simbólica e singularidade ao conxunto.
Irmandade do Cristo Resucitado
Pola súa banda, a Irmandade do Cristo Resucitado presentou o seu novo estandarte para desfilar na procesión da Santa Cea do Xoves Santo, co seu titular Xesús da Saúde na súa Flagelación (Xesús Richarte Mije, 2019). Neste estandarte destaca o cor vermella sobre a que está bordada a coroa de espiñas, a cana do Ecce Homo e a xara e a jofaina de Poncio Pilatos.
Artesanía e tradición mariñeira
Os novos estandartes, elaborados con materiais de alta calidade e coidada artesanía, incorporan elementos que reflicten tanto a identidade relixiosa como o arraigo mariñeiro da vila. Cada ensea foi deseñada con esmero para representar a historia e os valores da súa respectiva irmandade, combinando iconografía tradicional con detalles contemporáneos. A empresa Bordados Barber foi encargada da súa realización, seguindo as directrices dos promotores.
Esta empresa tamén realizou os estandartes para a Irmandade das Tres Negacións de San Pedro en 2019 e outros dous para a Venerable Irmandade da Virxe dos Dolores e a Soidade, en 2017: un sobre fondo azul para o terzo infantil e un segundo sobre fondo negro.
Isto forma parte dun continuo traballo de renovación que tamén acometeu a Confraría da Misericordia en 2024 cun novo estandarte para o Nazareno que procesiona na Santa Cea, no Santo Encontro e no Santo Enterro, así como o SPQR para o paso do Cristo das Tres Caídas en 2025.
Os responsables das confrarías destacaron o esforzo colectivo que supuxo este proxecto, así como a importancia de manter vivas as tradicións que forman parte do patrimonio cultural de Cangas.
A Semana Santa mariñeira do Morrazo, coñecida polas súas procesións vinculadas ao mar e polo seu carácter único en Galicia, verá así enriquecida coa incorporación destes novos símbolos, que contribuirán a realzar o valor estético e devocional das celebracións.
