A pouco máis de cinco meses do eclipse solar total do 12 de agosto, o sector turístico está decidido a explotar un fenómeno que promete atraer a milleiros de visitantes a Galicia e en particular á provincia de Lugo, onde moitos establecementos hoteleiros colgaron o cartel de completo ao ser unha das zonas nas que mellor se poderá observar este fenómeno.
Preparativos turísticos e previsións de ocupación
O director de Turismo de Galicia, Xosé Merelles, reuniuse este xoves con representantes dos nove destinos Starlight certificados pola súa calidade para a observación astronómica para coordinar a promoción deste fenómeno e analizar as previsións de visitas.
Ao coincidir coa primeira quincena de agosto, o Clúster Turismo de Galicia augura que a ocupación hoteleira se situará entre o 90 e o 95% e prevé unha maior afluencia de visitantes internacionais.
España será un dos catro países -xunto con Portugal, Groenlandia e Islandia- nos que o efecto da lúa ocultando completamente o sol será visible.
É tan pouco frecuente que o anterior episodio na península data de 1912. E as proxeccións indican que non se repetirá ata 2180.
Destinos Starlight e actividades programadas
Co obxectivo de crear un programa común de actividades ao que se lle dará proxección internacional, á cita deste xoves acudiron os responsables dos destinos Starlight de Chantada; da Reserva da Biosfera dos Ancares Lucenses e Montes de Navia; Cervantes e Becerreá; de Lalín; Costa da Morte; a Reserva da Biosfera Mariñas Coruñesas; Muras; do Parque Nacional das Illas Atlánticas e de Trevinca Valdeorras.
En seis destes emprazamentos poderase contemplar un eclipse total e nos outros tres será parcial.
Información e recursos para visitantes
A Xunta puxo á súa disposición o espazo sobre o evento que xa está habilitado na web www.turismo.gal, e animou aos concellos a "enriquecer" este espazo.
A plataforma conta xa cun mapa interactivo que permite consultar, punto por punto, a hora de inicio, duración e intensidade do eclipse en cada localización, segundo explicou Merelles, que indicou que Turismo de Galicia xa está posicionando a comunidade "como porta de entrada ao grande eclipse total" nas feiras e eventos profesionais.
En total, 143 concellos están na zona de observación privilexiada, o que abrangue desde o norte da provincia da Coruña, ata case todo Lugo, o nordeste de Ourense e zonas do interior de Pontevedra.
No resto de Galicia, será parcial. Arrincará arredor das 19.31 horas e prolongarase ata as 21.23. A máxima escuridade será de 20.28 a 20.30 horas.
Dispositivo de seguridade e coordinación institucional
O dispositivo de seguridade é outro piar. Foi o obxecto central da reunión que mantiveron este xoves o conselleiro de Presidencia, Diego Calvo, e o delegado do Goberno, Pedro Blanco.
Acordaron "traballar de maneira conxunta" ante o aumento da mobilidade previsto.
