A provincia de Lugo colocou seis novos establecementos na lista dos denominados “Soletes de Primavera” da guía gastronómica, unha distinción que premia espazos con alma, boa cociña e localizacións singulares. Entre os seleccionados hai dúas taperías, un restaurante á beira do río e tres cafeterías-confeitarias que amplían a oferta en cidades e municipios tan distintos como Sarria, Monforte, Navia de Suarna, Vilalba, Mondoñedo e a propia capital provincial.
Da tapería de aldea ao caserío de montaña: os novos recoñecidos
En Sarria, un dos puntos de paso máis transitados do Camiño de Santiago, ocupou un lugar destacado a tapería-colmado La Salina. Abriu as súas portas o 16 de abril de 2025 e, pese á súa relativa xuventude, conseguiu consolidarse pola súa proposta de cociña tradicional galega —caldo, cocido, volandeiras e croquetas caseiras— e polo seu formato íntimo: seis mesas no interior e outras seis na terraza, xa aberta para a tempada de primavera-verán. A súa propietaria, Lourdes Viñas, celebra o recoñecemento coa humildade de quen sabe que o traballo diario pesa máis ca os premios, e non dubida en enxalzar ao cociñeiro do local, Jesús Chaos, “porque teño un cociñeiro que é a pera”, di en conversa con este xornal.
Máis cara ao interior, en pleno macizo dos Ancares, figura o Caserío Meiroi, en Mosteiro (Navia de Suarna). Os seus donos, Carmen Pena e José López, manteñen unha oferta pautada polos ritmos da horta e a gandería propia: produtos que chegan da terra á mesa e se cociñan “coma quen conserva unha tradición familiar”, afirman dende o establecemento. O caserío funciona, ademais, como unha xanela a unha paisaxe arroupada por montes e silencio, un argumento tan forte para o turismo rural coma a súa cociña caseira.
Pola súa parte, Trespés, en Monforte de Lemos, celebrou o recoñecemento que o seu propietario, Brais Gómez, cualifica de “inesperado” e que coincide co noveno aniversario do local. Situado á beira do río Cabe, xunto á ponte medieval, Trespés fai bandeira da brasa e dos produtos de tempada: mexillóns, bonito de Burela á brasa ou un chuletón forman parte dunha carta que busca a proximidade e a sinxeleza ben executada. A súa terraza, moi valorada a partir da primavera, é un dos reclamos para veciños e visitantes.
Confeitarias con historia e vistas: Faragullas, Ebos e Ramón
A Guía non se esqueceu das confeitarias e nesta edición entraron tres establecementos que funcionan como pequenos fitos urbanos. En Mondoñedo, xunto á maxestosa fachada da súa basílica —Monumento Nacional dende 1902—, Faragullas ocupa unha esquina privilexiada. O seu responsable, Andrés Rodríguez, mantén a reputación do local polos pasteliños e tostas; o nome do café ten unha anécdota doméstica que devolve a memoria á tradición oral galega: “Meu avó, cando comías pan e che caían as migas sempre dicía que recollese as faragullas”, conta Rodríguez sobre a elección do nome.
En Vilalba, na comarca da Terra Chá, outro obradoiro súmase á lista. Ebos Obradoiro Doce, rexentado por Eduardo Balsa, é xa referencia local polos seus produtos artesáns. A mención quere recoñecer tanto a técnica coma a aposta pola materia prima de proximidade: bolaría e pastelería que funcionan igual de ben para veciños que buscan calidade diaria coma para visitantes en ruta.
A terceira confeitaria distinguida é Ramón, na cidade de Lugo. Situada no entramado urbano que gravita arredor da muralla romana —Patrimonio da Humanidade—, a cafetería converteuse nun punto de encontro onde mercar un doce ou deterarse a tomar un café entre turistas e re
