CONTIDO:
O Campionato Internacional de Baristas de Foz enche estes días a sala de actos do instituto focense, que organiza a cita.
Mohamed Anouar, que representou o centro, asegura que «en 2024 soñei con ser barista profesional». O estudante preparou as doce bebidas requiridas nos exercicios do certame con café da variedade Geisha resaltando as notas frutais do produto. Confía en «estar á altura» despois de gozar este xoves durante a elaboración e presentación ante os xurados.
Experiencia dos participantes
«Creo que me saíu xenial e a ver mañá (por este venres) cal é o resultado. Gocei moito e isto non é un día, viboo todos os días, isto acaba de empezar», afirmaba ao final da tarde, xa cun pouco de sono antes da cea de tapeo ofrecida polo departamento de Hostalaría aos asistentes.
Os concursantes prepararon catro expresos, catro con leite ou capuchinos e outras catro bebidas de especialidade.
Mohamed Anouar explicou que usou «leite fresco que soporta máis dozura e o frío, con notas a froita, que xa estaban presentes no expreso. Na bebida tamén destaquei as notas do café con zume de melocotón, xarope de mel de xasmín e xeo».
Desenvolvemento do certame
O estudante sinalou que durante o exercicio respondeu a que é o café falando do produto, do leite, do tueste, da extracción ante os xurados, aos que falou «como se fosen clientes».
Os baristas das 26 escolas participantes competiron na sala de actos do IES focense, que se enche dun público que segue con atención as explicacións e a evolución dos concursantes.
Na sala había estudantes, colaboradores e tamén patrocinadores chegados desde Valencia, Madrid ou Zaragoza.
Valoracións e probas paralelas
O coordinador da cita, Xosé Ríos, agradeceu o apoio das entidades públicas e privadas que colaboran co evento. O profesor considera que os concursantes acoden moi preparados á cita e resaltou, sobre todo, o traballo realizado polas escolas do País Vasco e as galegas, aínda que eludiu dar máis detalles, porque o nome dos gañadores coñecerase este venres, cando tamén se lles entregarán os premios.
Ríos destaca que «cada vez mellora o nivel da competición», un feito que atribúe á experiencia tras 18 edicións do certame.
As probas de cata de cafés foron este xoves no aula de tueste con 21 participantes. Pola mañá competiron en cata brasileira, con Patricia Fernández por Foz, mentres pola tarde celebráronse os concursos de sabores básicos e aromas no aula de cata.
As probas dos baristas desenvolvéronse en paralelo ás de cata durante toda a xornada, con 26 concursantes de 14 comunidades.
