O Camiño Francés recibe estes días a 60 membros da Unidade Militar de Emerxencias (Ume) con base en Valencia. O grupo comezou este domingo a súa peregrinación na localidade de Sarria co fin de chegar a Santiago tras completar cinco etapas.
Estes militares pertencen á compañía de Plana Maior e Servizos do Terceiro Batallón de Intervención en Emerxencias (Biem III). O percorrido pola ruta xacobea enmárcase dentro dos exercicios programados pola unidade.
De cara a afrontar esta actividade, os participantes levaron a cabo unha preparación específica durante os últimos dous meses.
Este domingo percorreron os algo máis de 20 quilómetros que separan Sarria e Portomarín. Á primeira hora da mañá saíron da vila, á que chegaran o sábado e pernoctaron no pavillón dos institutos, situado na Rúa Castelao. A presenza dos vehículos da Ume chamou a atención dos veciños.
Sobre as cinco da tarde finalizaron a primeira etapa en Portomarín. Os efectivos formaron na Praza Conde de Fenosa e colocaron a cuncha do peregrino no estandarte da compañía, acto que foi seguido por varias persoas que paseaban polo centro da localidade.
Os militares continuarán este luns o seu exercicio pola ruta xacobea, que os levará ata Palas e co obxectivo de rematar en Compostela o xoves.
Estes efectivos que percorren o Camiño interviñeron en emerxencias como a tráxica dana de Valencia do 29 de outubro de 2024, na que faleceron máis de 200 persoas. O batallón, con base no municipio de Bétera, tamén actúa noutros sucesos, como incendios forestais, rescates ou grandes nevaradas e outros fenómenos meteorolóxicos.
Esta non é a primeira vez que o Camiño de Santiago acolle a militares dentro dos seus exercicios. Pola ruta pasaron membros do Centro Militar Canino da Defensa de Madrid, do Grupo de Obtención por Sistemas Aéreos do Rexemento de Intelixencia número 1 ou da Academia Básica do Aire. Estes dous últimos están situados na provincia de León.
Tamén a UME tivo presenza na comarca. Hai tres anos, máis de cen efectivos do Quinto Batallón de Intervención en Emerxencias (BIEM V), con base en León, preparáronse con diversos exercicios para facer fronte a graves inundacións. Tiveron como base Oural e Paradela.
