O secretario de Estado dos EUA, Marco Rubio, xunto ao presidente Donald Trump.

Unha semana despois do inicio do ataque dos Estados Unidos e Israel contra Irán, o presidente Donald Trump anunciou un acordo cos maiores fabricantes de armamento estadounidense para cuadriplicar a produción de “armas de clase exclusiva”.

O republicano non especificou a cales se refire en concreto, aínda que ese concepto adoita empregarse para designar o armamento máis sofisticado, custoso e de produción limitada.

Un amplo espectro que inclúe desde cazas furtivos de quinta xeración F-22 Raptor, a mísiles interceptores de defensa antiaérea como os THAAD ou mesmo portaavións de propulsión nuclear como o USS Ford.

O anuncio chega en plena preocupación polos limitados inventarios de interceptores, que Washington está a consumir en Irán a un ritmo moi superior ao que pode repoñelos.

Acordo cos xigantes da industria armamentística

Trump anunciou o acordo tras reunirse a última hora do venres na Casa Branca con executivos de Boeing, BAE Systems, L3Harris, Lockheed Martin, Raytheon e Northrop Grumman, xigantes que están a facer o seu agosto coa espiral bélica que sacode o mundo e o gasto disparado en Defensa da Administración Trump.

“Acordaron cuadriplicar a produción de ‘armas de clase exclusiva’. Con eles queremos acadar o máis rápido posible os niveis máis altos en termos cuantitativos”, escribiu na súa rede social.

“A expansión comezou tres meses antes da reunión e a produción de moitas destas armas xa está en marcha”.

Incremento do gasto militar e novas intervencións

O mesmo dirixente que prometera non comezar novas guerras ao abrir o seu segundo mandato xa bombardeou sete países en apenas 14 meses e vén de embarcarse nunha guerra con Irán con consecuencias dramáticas para toda a rexión, por non falar dos riscos crecientes que xerou para a economía mundial.

O pasado mes de xaneiro Trump anunciou a súa intención de aumentar nun 50% o orzamento en Defensa, unha contía que superaría o gasto combinado neste ámbito dos oito países que lle seguen na lista.

Tras atacar Venezuela ou Irán, o republicano puxo a outros países como Cuba no punto de mira, o que suxire que non pensa rematar pronto coas súas intervencións militares no estranxeiro.

Detalles dos acordos e advertencias sobre os inventarios

Publicacións especializadas en Defensa como 'Breaking Defense' sinalan que non está claro se o acordo do venres inclúe partidas adicionais ás xa anunciadas polo Pentágono nos últimos meses.

Nun deses acordos plurianuais con Lockheed, a empresa comprometeuse a triplicar a produción dos mísiles antiaéreos PAC-3, que forman parte do sistema Patriot, e cuadriplicar a dos interceptores THAAD.

Algo semellante ao que se acordou con Rytheon, neste caso para multiplicar a fabricación de mísiles de cruceiro Tomahawk, os mísiles aire-aire AMRAAM ou varios tipos de interceptores para a defensa balística.

É dicir, tanto armas ofensivas como defensivas.

Varios analistas en Defensa advertiron nos últimos días que os EUA contan con existencias limitadas de mísiles de precisión para a defensa antiaérea, utilizados agora para protexer as súas bases militares na rexión ou ao propio Israel das represalias iranianas.

Esa munición estase consumindo a un ritmo tan rápido que, “en só uns días”, podería verse obrigado a priorizar que activos protexe, segundo publicou ‘The Washington Post’.

Tanto a Casa Branca como o Pentágono negaron que o nivel actual dos stocks poida supoñer un problema.

Reaccións e novas vendas de armas a Israel

“Apoiamos os esforzos do presidente para producir capacidades militares con maior celeridade e investimento”, afirmou Northrop Grumman nun comunicado, tras participar na reunión con Trump.

“Grazas ao noso investimento líder na industria e a décadas de experiencia demostrada, continuamos ampliando a nosa capacidade de produción e proporcionando tecnoloxías totalmente operativas para os combatentes do país”, engadiu.

En paralelo ao acordo anunciado por Trump para impulsar a produción doméstica de armas, a súa Administración aprobou a venda dunha nova partida de armamento a Israel, que mantén guerras abertas en varios frontes.

Concretamente unha partida de 152 millóns de dólares para entregar ao Estado xudeu 12.000 bombas aéreas de propósito xeral (BLU-110 A/B) e 1.000 carcasas para bombas de media tonelada, segundo o Departamento de Estado.

A Administración aprobou o envío sen buscar a autorización do Congreso, algo que tanto Trump como o seu predecesor demócrata Joe Biden fixeron varias veces nos últimos anos para apoiar a Israel.

O Departamento de Estado que dirixe Marco Rubio argumentou que existe unha situación de emerxencia que esixe a venda inmediata do armamento ao Estado xudeu, unha operación que, segundo dixo, responde ao "interese da seguridade nacional dos EUA".