O Celta morre na beira tras remar durante 94 minutos

Celta-Real Madrid, en imaxes /

O Celta tivo o partido nas súas mans ata o minuto 94. Con empate a 1 no marcador, Fer López perdeu o balón no medio do campo tras tentar un desafortunado e innecesario taconazo, roubáronlle despois a pelota, quizais con falta, e a xogada acabou co gol da vitoria, rubricado por Fede Valverde tras rebotar o balón en Marcos Alonso.

O Real Madrid, que se presentou plagado de baixas sensibles, controlou a maioría dos tramos do encontro e abriu o marcador cun tanto madrugador de Tchouaméni, pero a escadra viguesa nivelou o choque aos poucos minutos cunha diana de Borja Iglesias tras unha xogada brillante.

Un inicio vibrante en Balaídos

Ferran Jutglà e Mingueza figuraron como as novidades de saída, se se pode dicir así dese sempre mutante once inicial de Claudio Giráldez. Ambos, cataláns e ex do Barça.

O ariete viña de lucirse fronte ao Girona cun golazo o pasado luns, pero hoxe non estivo fino, e o carrileiro foi clave no gol do empate deste venres cun centro exquisito coa esquerda.

Tras unha espectacular actuación da orquestra SonDeSeu, que interpretou a peza ‘Like a Prayer’ de Madonna a modo de homenaxe polo seu concerto na cidade en 1990, Balaídos, a rebosar, desfrutou da primeira ocasión do lado local.

Borja Iglesias conectou un forte disparo desde a frontal da área que ataxou cunha magnífica estirada Courtois.

Dominio visitante e reacción celeste

Á marxe deste conato, foi o conxunto capitalino o que tomou as rendas do choque, unha actitude previsible, pois chegaba a Vigo desesperado despois de sumar dúas derrotas consecutivas en LaLiga –Osasuna e Getafe-.

Sen xogadores como Mbappé, Bellingham, Carreras, Rodrygo, Camavinga, Huijsen e Mastantuono, entre unha longa lista, dominou boa parte da primeira metade e xa no minuto 9 deu o primeiro aviso: Vinícius plantouse só ante Radu tras unha carreira cara á porta e estrelou no pau longo un balón que se paseou pola liña de gol ameazante ata que foi atrapado polo porteiro rumano.

Só dous minutos despois, o susto converteuse en mazazo. Os merengues apretaron a caseta rival ata dar con un córner -inexistente- que Tchouaméni transformou no tanto inaugural. O francés rematou a pracer no bordo da área nun lance defendido de xeito pésimo polos celestes.

A diana dos visitantes non cambiou o guión. O Celta pecaba de imprecisión, especialmente un Borja Iglesias que, paradóxicamente, se encargou de volver tola á parroquia viguesa e mudar por completo o ambiente do choque instantes máis tarde.

Concretamente no minuto 25, o picheleiro perforou as mallas a un palmo da portería aproveitando unha xogada exquisita dun Swedberg que lle ten tomada a medida ao Madrid -na ida, sentenciou a contenda tras deixar sentado ao propio Courtois-.

Esta vez, o sueco amarrou ao céspede a Trent tras romperlle a cintura na liña de fondo para cedérlle a posteriori o balón ao Panda. Mención aparte merece a asistencia previa de Mingueza no inicio da xogada: pegoulle ao balón coa súa ‘perna mala’ e co efecto preciso para sortear á defensa madridista.