Galicia rexistrou 3.086 nacementos no primeiro trimestre de 2026, a cifra máis baixa desde 1996, segundo os datos provisionais do movemento natural da poboación publicados polo Instituto Galego de Estatística (IGE) con data 25/09/2026. Os nacementos de nais residentes en Galicia descenderon un 2,22% respecto ao primeiro trimestre de 2025, interrompendo unha serie de tres trimestres consecutivos de crecemento interanual.
A evolución foi distinta segundo o sexo: os nacementos de nenos aumentaron un 2,72%, mentres que os de nenas reducíronse un 7,18%. Por provincias, os nacementos creceron en Lugo (un 2,08%) e Pontevedra (un 1,41%), e diminuíron na Coruña (un 4,29%) e Ourense (un 10,65%). O 78,32% dos nacementos contabilizáronse nas provincias occidentais: o 43,36% na Coruña e o 34,96% en Pontevedra, fronte ao 12,70% de Lugo e o 8,98% de Ourense.
Por idade da nai, o maior número de nacementos rexistrouse no grupo de 30 a 39 anos, que en conxunto supuxo o 62,54% do total. Destacan tamén os nacementos de nais de maior idade: as de 40 a 44 anos representaron o 13,25% e as de máis de 45 anos o 2,20%.
As defuncións case triplican os nacementos
As defuncións de persoas residentes en Galicia ascenderon a 9.185 no primeiro trimestre de 2026, case o triplo dos nacementos e a proporción máis alta nos últimos 30 anos. A cifra supón un aumento do 0,32% respecto ao mesmo trimestre de 2025, e encadea tres trimestres con taxa interanual positiva. O incremento debuse ao aumento dos falecementos entre as mulleres, con 79 máis, mentres que entre os homes rexistrouse unha diminución de 50 defuncións.
Por provincias, as defuncións aumentaron en Lugo (2,91%) e Pontevedra (3,29%), e diminuíron na Coruña (1,71%) e Ourense (2,79%). Máis da metade dos falecementos (o 56,06%) foi de persoas de 85 ou máis anos, e o 34,57% correspondeu ao grupo de 65 a 84 anos. No caso das persoas de 85 ou máis anos, máis do 60% das defuncións foron de mulleres, mentres que por debaixo dos 85 anos predominan as de homes.
Os matrimonios caen un 5,44%
Tras cinco trimestres consecutivos con taxas interanuais positivas, no primeiro trimestre de 2026 rexistráronse un 5,44% menos de matrimonios de persoas con residencia prevista en Galicia: 1.409 matrimonios fronte aos 1.490 de 2025. Aínda así, é a segunda cifra máis alta nun primeiro trimestre desde o ano 2000.
