As carencias ofensivas volveron condenar ao Reyco Burela FSF, que se viu superado por un Alcantarilla ao que lle abondaron tres chispazos para levar os puntos do Vista Alegre (0-3), na undécima derrota consecutiva para as de Belén Feal, cada vez máis preto da Segunda División.
Aínda non se sentaran os espectadores no Vista Alegre e o Alcantarilla xa estaba por diante no marcador cunha acción de estratexia que Míriam colocou na portería de Ana Eliza. Antes do minuto 10 repetiu Míriam e o partido púxose xa costa arriba para as locais, que, non obstante, mantiveron o tipo e tiveron boas chegadas para intentar meterse no partido antes do descanso, ao que se chegou co 0-2.
As locais saíron máis concentradas na segunda metade e buscaron con afán recortar diferenzas, pero Bet Carrasco aproveitou un rexeite para sentenciar no ecuador e o marcador xa quedou no 0-3 ata o final.
O partido de onte supuxo o regreso ao pavillón Vista Alegre de tres lendas do club burelés como Jozi, Dani e Cami, que agora militan no Alcantarilla. As tres xogadoras brasileiras recibiron as ovacións e o cariño do público que se congregou no Vista Alegre polo seu pasado cheo de títulos no club mariñán.
