Nun contexto no que os prezos dos carburantes non deixan de subir, estes consellos seranche útiles
10 hábitos clave para reducir o consumo de combustible / Arquivo
A importancia da condución eficiente
A condución eficiente non só alivia o peto do consumidor, senón que tamén prolonga a vida útil do vehículo e reduce as emisións de CO2.
Por iso, e a raíz das últimas fluctuacións que están a sufrir os prezos dos combustibles, traémosche unha serie de consellos para que poidas reducir o consumo de combustible.
Consellos para aforrar combustible
En motores modernos, non é necesario quentar o coche parado. Recoméndase iniciar a marcha suavemente xusto despois de arrancar (e agardar uns segundos se é un motor diésel turbo).
Hai que evitar frenazos e aceleróns bruscos. Manter unha velocidade constante é a forma máis eficaz de aforrar.
Se se observa un semáforo en vermello, hai que levantar o pé do acelerador e deixar que o coche rode coa marcha engrenada; o consumo nese momento é cero.
Circula o maior tempo posible nas marchas máis longas e a baixas revolucións. Na cidade, sempre que sexa posible, utiliza a 4ª ou 5ª marcha respectando os límites.
Hai que manter unha distancia de seguridade axeitada que permita actuar ante posibles imprevistos, evitando aceleróns e frenazos bruscos.
A anticipación é clave para o aforro.
Se se vai estar detido máis dun minuto, como pode ser nun atasco ou nunha retención nun túnel, aconséllase apagar o motor para evitar o consumo en ralentí.
Mantemento e factores que inflúen no consumo
Conducir cunha presión inferior á recomendada aumenta a resistencia á rodaxe e o consumo de combustible ata nun 3%.
Se está moi desinchado, o consumo pode dispararse ata un 7% ou 10%. Recoméndase revisar a presión mínima unha vez ao mes.
O sistema de aire acondicionado é un dos elementos que maior consumo enerxético xera no vehículo, polo que se recomenda un uso responsable.
Na condución por estrada, resulta máis eficiente utilizar o aire acondicionado que circular coas xanelas baixadas, xa que estas alteran a aerodinámica do vehículo e aumentan o consumo de combustible.
No caso de vehículos híbridos e eléctricos, é importante que o sistema de refrixeración funcione para arrefriar as baterías do coche e evitar sobrequecementos.
Evita levar o maleteiro cheo de obxectos innecesarios. O exceso de peso obriga o motor a traballar máis.
Planificación e mantemento do vehículo
Unha planificación inadecuada da viaxe pode alongar o traxecto de forma innecesaria.
O uso de aplicacións de tráfico en tempo real permite anticipar retencións e evitar atascos, situacións nas que o consumo de combustible se incrementa de maneira significativa.
Un filtro de aire sucio ou unhas buxías en mal estado impiden que a combustión sexa eficiente, aumentando o gasto de combustible de forma silenciosa.
Cada fabricante establece un intervalo de mantemento diferente e adoita recomendarse cada 15.000 ou 30.000 km para o filtro de aire.
No caso das buxías, aconséllase facelo cada 30.000 ou 45.000 km se son de cobre. No caso de platino iridio, poden aguantar un pouco máis, ata os 80.000 km.
