O Durán Maquinaria Ensino sumou a súa décimo terceira vitoria na Liga Feminina ante o pechacancelas Gran Canaria (102-66) nun encontro de claro dominio local dende o salto inicial.

O conxunto dirixido por Suso Garrido pisou o acelerador dende o inicio para evitar calquera tipo de sorpresa ante as insulares. Deste xeito, grazas á achega de Lydia Giomi en ambas zonas, as locais situáronse cunha cómoda renda de 13-0, tras un triplo de Aless Orsili. Un parcial que deixaba ás claras a diferenza de potencial entre ambos equipos.

O rebote pertencía en exclusiva ao Ensino, que corría en cada posesión. Un ritmo incapaz de seguir para o Gran Canaria, que tardou cinco minutos en materializar a súa primeira canastra en xogo (15-2).

A diferenza disparouse ao final do primeiro cuarto ata o 23-10.

Maimouna Haidara lideraba ao Durán Maquinaria Ensino, que puxo a xogar á súa segunda unidade para repartir os minutos nun partido que camiñaba pola senda da tranquilidade cun 7 de 12 en tiros de dous para as locais, ante un equipo canario que xa acumulaba 7 perdas.

O segundo cuarto serviu para que o Gran Canaria reaccionase cun parcial de 2-11 para deixar o resultado en 26-15. O Ensino non podía durmirse ante o tirón visitante e foi Imani Tate quen colleu o testemuño de Maimouna Haidara para pechar a ferida en ataque.

Catro puntos consecutivos da ala-pivote local fixeron que Rafa Calvo parase o partido cun tempo morto balsámico.

As lucenses volveron facerse donas do tempo do partido coa entrada de Alicia Flórez e volveron romper o partido ao contragolpe (32-19) a falta de 5.38 para chegar ao tempo de descanso. Richardson era a única rival que poñía en xaque á defensa local.

O regreso á pista do quinteto titular foi o pulo definitivo para devolver a calma ao marcador. Giomi sumaba xa 9 rebotes e era o imán de todos os balóns dentro da zona. As súas accións eran un seguro. Remataban en canastra ou falta da rival. Deste xeito, o Durán Ensino marchaba ata os 19 de vantaxe (44-25) a 1.40 para chegar ao ecuador.

Antes, Maimuna Haidara sumou o seu punto 21 nun brillante exercicio persoal directo ao seu récord persoal durante esta tempada, para chegar ao descanso 50-21.

A reanudación trouxo un conxunto lucense intratable con tres triplos consecutivos de Zoe Hernández, Aless Orsili e Imani Tate (59-32) para deixar aínda máis preto a vitoria.

Rafa Calvo parou o partido para intentar unha última reacción que nunca se produciu. O Ensino controlou o partido ao seu antollo para levar a máxima renda ata os 41 puntos (89-48) no terceiro cuarto.

O último período non tivo máis historia que a ratificación do extraordinario partido de Haidara, autora de 23 puntos, 19 deles na primeira metade, que selaron unha vitoria inapelable do Ensino.