O Reyco Burela FS encaixou a súa terceira derrota consecutiva ante rivais da zona alta ao perder por 2-1 na pista do Zambú Pinatar, quinto clasificado. O castigo foi severo e inxusto polos méritos contraídos polo cadro de Juanma, superior durante tres cuartas partes do partido, pero lastrado pola súa falta de tino ante o gol e pola súa defensa no porteiro-xogador, encaixando o 2-1 no último minuto.

O primeiro tempo rematou con só dous goles (1-1) grazas á boa actuación dos porteiros, Diego Torres e Torero, que frearon con acerto as numerosas tentativas de ambos equipos.

Comezou mandando o cadro burelés, moi ben asentado sobre a pista e presionando moi arriba a saída dun Pinatar incómodo. Izan xa puido marcar no primeiro minuto cun bo disparo e o pau evitou na acción seguinte o 0-1 para os visitantes.

En pleno monólogo laranxa tiveron opcións Pitero, Raid e Nico antes do minuto 8, pero atopáronse con Diego Torres, que salvou ao seu equipo.

O Zambú estirouse e Torero entrou en acción para frear a Espín e Juanpi, aínda que tamén Pitero gozou dunha dobre ocasión para marcar nun cruce de chegadas que non acabou en gol de milagre.

No treito final foi mellor o Pinatar, que aproveitou unha das súas oportunidades para poñerse por diante grazas a un tanto de Meira, exxogador do Burela FS, a pase de Pablo Ibarra.

O resultado incluso puido ser máis favorable para os locais, pero o pau impediu o segundo tanto do Zambú antes do descanso. O que non desaproveitou a opción foi o Burela FS, cun dobre penalti que non fallou Izan para poñer xustiza no marcador.

A segunda metade foi un monólogo visitante, non só no xogo, senón tamén nas chegadas, pero Izan, en varias ocasións, Charly, Pitero, Nico e Raid atopáronse cun inabordable Diego Torres, que mantivo con vida ao seu equipo ata os minutos finais.

Foi entón cando o equipo local apostou polo porteiro-xogador e Coba afundiu os burelenses co 2-1, xa no último minuto.