Fernando Alonso / Aston Martin F1 Team
Fernando Alonso segue tirando do ‘carro’ en Aston Martin a pesar de todos os problemas que acumulan os de Silverstone desde a pretempada.
Cando moitos dubidaban mesmo de que hoxe puidese saír a disputar a clasificación do GP de Australia (de feito, o seu compañeiro Lance Stroll non o fixo, tras sufrir un fallo no motor de combustión), o asturiano volveu facer gala da súa determinación e coraxe e estivo a piques de meterse en Q2, aínda que quedou a algo máis de tres segundos dos mellores.
Clasificación complicada en Australia
Finalmente Alonso sairá 17º este domingo no GP de Australia: “Foi difícil, non hai ningún segredo. Sabemos en que situación estamos e o reto que temos por diante e cada día imos aprendendo algo.
Temos a mesma unidade de potencia e o mesmo déficit de onte. Onte estabamos a catro segundos e hoxe a tres. Non cambiamos nada, só melloramos un segundo e medio porque puidemos dar voltas, cousa que non puidemos facer no inverno nin na FP1”, analizou ao remate da sesión en Melbourne.
Melloras e potencial do coche
“Non tiven ningún problema nos Libres 2 e nos Libres 3 e iso permitiume estar na pista en sincronía con outros coches e poder traballar no set-up. Aínda que a unidade de potencia sexa a mesma ca onte, gañamos un segundo e medio só por rodar e optimizar algunhas cousas do chasis”, insistiu.
“Sabemos do potencial do coche, só nos falta un pouco de fiabilidade para desbloquear todo o potencial do chasis e logo levará moito máis tempo desbloquear o potencial do motor”, advertiu Alonso, que considera que unha vez consigan resolver os actuais problemas, seguirán a dous segundos dos mellores: “E iso levará moito máis tempo”.
Aos seus 44 anos non hai demasiado marxe para el.
Perspectivas de futuro e próximos retos
“Cada volta que damos… Sabemos que temos moito que desbloquear aínda do chasis. En Bahréin dabamos 40 ou 50 voltas, pero sempre eran todas alteradas pola unidade de potencia, que non che deixaba facer un traballo continuo de desenvolvemento do coche.
Aquí tivemos unha sesión e media de desenvolvemento do coche e melloramos segundo e medio, iso diche o potencial. Se tivésemos tres ou catro Grandes Premios normais, creo que aínda queda outro segundo de chasis por desbloquear simplemente por rodar máis e entender a dinámica. Unha vez fixado iso, quedaríannos dous segundos, que eses semellan difíciles de recuperar”, explicou.
Expectativas para a carreira e o futuro inmediato
Sobre o que espera de cara á carreira, a primeira co novo regulamento da F1, Fernando amosouse cauteloso: "Veremos como imos. Non é un segredo que non temos repostos das baterías así que, ao mínimo dato anómalo que vexan na telemetría teremos que parar o coche para poder correr en China", advertiu.
A proba en Shanghai, China, a vindeira semana, é en formato sprint: “Só teremos unha sesión de adestramentos libres, porque logo chegamos á crono co sprint, así que o que poidamos aprender mañá e nos libres 1 de China marcaranos a fin de semana que vén.
É importante seguir coñecendo o coche e estar unidos. Sabemos que temos este reto por diante e hai que afrontalos entre todos”, concluíu Fernando, non sen antes descartar cun rotundo “non”, que mellorase o problema coas vibracións do motor Honda.
