O servizo de abastecemento municipal de auga de Vilalba rexistrou este martes unha nova avaría na Rúa Cidade de Viveiro, o que suscitou as críticas de veciños e usuarios, por tratarse dunha situación que se repite no tempo.

O subministro viuse interrompido desde primeira hora da mañá e desde o Concello informaron arredor das 11.00 horas que se debía a unha fuga e que se verían afectados os números impares desta rúa durante a mañá.

Persoal de Espina e Delfín, empresa encargada da xestión do servizo, leva varias horas traballando para restablecer o subministro. "Pedimos desculpas polas molestias e agradecemos a comprensión da veciñanza mentres se resolve a incidencia", afirmaron desde o Concello.

Porén, as críticas dos veciños non se fixeron agardar, cualificando de "vergoñento" o ocorrido. "Somos a rúa tercermundista de Vilalba", apuntou outra usuaria.

Outros fixeron fincapé en que era a segunda incidencia en menos de dúas semanas, xa que a anterior se produciu o pasado 19 de febreiro.

As queixas polo estado da rúa intensificáronse desde comezos de ano, denunciando o seu deficiente estado, non só polas continuas avarías no subministro de auga, senón tamén polos desperfectos nas beirarrúas, provocados polo paso do tempo, os arranxos nas tubaxes e o feito de que os coches aparquen enriba delas para que quede suficiente espazo para circular pola calzada.

O asunto chegou a abordarse mesmo no último pleno ordinario, celebrado o 28 de xaneiro, a través dunha proposta do PP, que demandaba ao goberno local que presentase un proxecto ante a Deputación, titular da vía, para chegar a un acordo entre ambas entidades para acometer unha renovación integral dos servizos na Rúa Cidade de Viveiro.

O edil de Infraestruturas Urbanas, Luis Fernández, recoñeceu que o problema está en que "todas as canalizacións están obsoletas" e lembrou que "da Deputación é o chan e o saneamento e as beirarrúas dependen das dúas" administracións.

Fixou tamén especial fincapé no elevado custo da actuación que se propoñía. "Ao mellor estase a falar duns 1,7 millóns de euros", calculou.