Un rival ante o que o CD Lugo invertiu unha tendencia e ante o que buscará entrar entre os cinco mellores do Grupo I da Primeira RFEF. O Athlétic de Bilbao B visita mañá venres (19.00 horas) o Anxo Carro para enfrontarse cos de Yago Iglesias, que equilibraron a súa fonte de puntos desde o último enfrontamento entre ambos. Lucenses e biscaínos xogaron en Lezama hai tres meses. Aquel partido que gañaron os locais por 2-0 foi o último que os rojiblancos perderon fóra de casa, onde conseguiron case tantos puntos como xunto ao Miño desde aquel 29 de novembro. Ata o partido de Lezama aos pupilos de Yago Iglesias custáballes xogar fóra de casa. Disputaran sete compromisos, nos que sumaron catro puntos de vinte e un posibles merced a catro empates e tres derrotas. Tras xogar en Bilbao, o equipo lucense gañou dous partidos e empataron outros tres para engadir nove puntos de quince á táboa clasificatoria. Antes de Lezama a fonte de puntos manaba principalmente do Anxo Carro —once puntos de quince posibles polos catro fóra—; tras esa decimocuarta xornada equilibrouse, xa que xunto ao seu público acadou dez unidades por nove lonxe do seu feudo. Como visitante, o Athlétic B é o oitavo mellor do Grupo I, con quince puntos produto de catro vitorias e tres empates. Recibirallo un Lugo que reconduciu a súa fortaleza no Anxo Carro. Despois das súas dúas derrotas consecutivas —as primeiras da tempada— ante o Unionistas de Salamanca (1-3) e a Ponferradina (0-2) impúxose ao Guadalajara (2-0) hai dúas semanas nun dos mellores partidos da tempada. Será clave volver ter fiabilidade como local para buscar colarse entre os cinco mellores. Non será unha opción tan clara como na anterior xornada en Pasarón. Na casa do Pontevedra, unha vitoria ante os granates metíalos nas posicións de play off. Mañá, gañar ao Athlétic non significa matematicamente entrar entre os mellores. Unha vitoria permitirá sobrepasar aos vascos, cuartos na táboa. Alcanzarían os 40 puntos os lucenses por 39 do filial biscaíño, pero precisarían que se cumprisen dúas destas catro opcións: que non gañasen o Barakaldo, o Castilla ou o Mérida ou que perdese o Pontevedra. O Lugo podería chegar a ser terceiro en caso de vitoria. Mais para iso terían que darse os catro marcadores anteriormente citados. Podería colarse mesmo cun empate, sempre que non sumasen punto algunha os extremeños, os madrileños e os biscaínos.
Teñen encontros comprometedores o Mérida e o Castilla. Os primeiros xogan no campo do Celta B, mentres que o filial madridista mídese en Valdebebas coa Ponferradina. Máis sinxelos teñen os seus duelos o Barakaldo —en Getxo— e o Pontevedra, que xogará en Tajonar ante o Osasuna B. O Lugo segue pendente do estado dos seus lesionados para enfrontarse ao Athlétic B. Mentres que a posibilidade de que Kevin Presa poida xogar ante os vascos parece case un feito, hai máis dúbidas para recuperar a Pastrana, a Diego Caballo e a Antonio Perera. O mediocampista de Ponteareas adestrou co grupo cunha máscara para protexer o seu rostro. Por iso parece probable que poida ser alineado ante o Athlétic B. Pola súa banda, os catro lesionados musculares son seria dúbida. As baixas confirmadas serán os sancionados José Amo, por acumulación de amonestacións, e Santi Samanes, que viu dúas amarelas en Pasarón e o colexiado incluíu no acta que rompía o pomo da porta do vestiario dos colexiados. Este mércores foi sancionado con un partido.