Arredor de medio cento de persoas concentráronse este xoves diante do centro de saúde de San Román de Cervantes para esixir a cobertura das prazas de medicina e enfermaría destas instalacións e do consultorio de Doiras.
Esta protesta súmase ás convocadas en semanas pasadas polo BNG e á que, nesta ocasión, se sumou o Concello.
Reivindicacións pola Atención Primaria
Segundo explica o tenente de alcalde, Miguel González, a decisión de aliarse co Bloque para reivindicar unha Atención Primaria "en condicións" para o municipio débese á "ausencia de novas e de avances por parte do Sergas" despois da xuntanza co xerente da área sanitaria de Lugo, Ramón Ares, hai case un mes.
"Pasou o prazo que lles demos e non se moveron", engade González, que indica que desde o goberno local tamén se rexistrou unha queixa e se enviaron escritos á Consellería de Sanidade, á área sanitaria de Lugo, A Mariña e Monforte e ao ministerio para que "nos dean explicacións sobre que está pasando, por que non se cobren as prazas e, o máis importante, por que non se sacan a concurso".
Situación da praza de Doiras
Miguel González indica, neste sentido, que a praza de médico de Doiras —esta semana permaneceu sen actividade, aínda que o Concello non recibiu ningunha comunicación oficial sobre o seu peche— "leva sen cubrir un ano e medio porque nin sequera se oferta".
Por iso piden que se oferten as prazas vacantes "o tempo que sexa necesario" ata cubrilas, que se restableza o servizo e que, no caso de que a Xunta decida pechar o consultorio de Doiras, "polo menos que nolo digan, pero que non anden ás agochadas".
Postura dos partidos e do Sergas
O BNG coincide nas peticións e acusa ademais ao PP de "aplicar unha política consciente de deterioración da sanidade pública no rural: primeiro recortan, despois precarizan e finalmente pechan servizos", o que se agrava en Cervantes, en plena Montaña lucense e cunha poboación envellecida.
Pola súa banda, o Sergas insiste na falta de profesionais nas listas como o motivo que impide cubrir de forma estable as prazas, aínda que González aposta por unhas "condicións dignas" na contratación de sanitarios.
