O PP de Monforte considera que o servizo de bus rural que puxo en marcha o goberno municipal de José Tomé está infrautilizado porque nos dous primeiros meses de funcionamento rexistrou 90 usuarios.

En concreto, e segundo os datos que o PP recibiu do propio equipo de goberno, en decembro houbo 17 usuarios e en xaneiro situouse entre os 60 e os 70. “Unhas cifras moi reducidas para un contrato de tan elevado custo”, dixo a voceira popular, Katy Varela.

Varela insistiu en que o servizo ten un custo superior ao millón de euros en dez anos, o que se traduce nun custo anual para as arcas municipais de arredor de 112.000 euros.

A popular engadiu que o servizo “conta cun condutor contratado a xornada completa a pesar de que os percorridos suman dúas horas ao día, segundo se constata no prego de condicións do contrato”. Segundo denuncia o PP, hai un total de cinco rutas semanais en horario de luns a venres. Hai unha saída ás 8.00 e outra ás 14.00 horas. Cada percorrido dura unha hora, o que suma as dúas horas “efectivas” das que fala a formación. Os populares piden que o alcalde aclare cales son as atribucións do condutor máis alá das rutas.

Varela apuntou que o bus é “un servizo fundamental para os veciños das parroquias pero está infrautilizado”. “É unha cuestión de responsabilidade política e de boa xestión dos recursos públicos aclarar os detalles do servizo”, engadiu.

Para os populares é necesario un transporte rural útil e eficaz, adaptado ás necesidades reais dos veciños, pero tamén cunha xestión transparente e racional.