Esther Mora abriu en setembro de 2024 na céntrica Rúa Nova de Lugo a tenda que sempre soñou, unha de xogos de mesa. Bautizouna Nautilus, como o submarino que recreou Jules Verne nas súas exitosas novelas de ciencia ficción. Embarcouse nesta aventura despois de exercer como enxeñeira durante máis de un cuarto de século.
Se daquela converteu o seu pasatempo preferido no seu medio de vida, agora deu outro xiro á súa traxectoria profesional. A finais deste mes pechará a tenda porque acaba de aprobar unha oposición da Administración Xeral do Estado.
Este novo xiro vital responde, segundo explica Esther Mora, a que lle resulta "complicadísimo conciliar" a súa actividade laboral coa persoal porque abre a tenda de luns a sábado, mañá e tarde. "Non pensaba que sería tan duro", recoñece, cando lembra cando decidiu emprender.
"Intentar manter un negocio aberto seis días á semana, 52 semanas ao ano, faise bastante incompatible con intentar levar unha vida normal sobre todo sendo unha persoa soa", asegura.
Sobre ese cambio radical escúdase en que é "un pouquiño inqueda" e explica que "buscaba algo que me permitise ter máis liberdade, así que presenteime a unha oposición que cría que podía superar e aprobei". Agora está pendente de que se publiquen as prazas dispoñibles para elixir.
A Esther Mora cústalle desfacer da súa tenda porque ten "moito valor sentimental". Explica que a puxo en marcha porque considera que Lugo, cidade de acollida desta madrileña desde 2007, "precisaba un sitio deste estilo" que, ao seu xuízo, "dá visibilidade aos xogos de mesa que a min me gustan e que a xente descoñece".
Non se atreve a nomear un cando se lle pregunta que xogo de mesa podería exemplificar os "vaivéns" que lle deu a vida, pero si cita un dos que máis lle gustan, Tranvía mortal, polos "dilemas morais" aos que se enfronta o participante.
Esta autónoma en despedida e funcionaria en capela está buscando a algunha persoa que queira facerse cargo da tenda porque di que é un negocio de "un gran potencial ao que se lle pode sacar proveito" porque, ademais da venda de produtos e de ter "unha clientela consolidada" e "unha conta de Instagram con centos de seguidores", dispón dunha sala de xogos na que se poden organizar "obradoiros e outras actividades".
Defende que estes xogos contribúen ao "desenvolvemento de capacidades, como a mellora na concentración, a memoria ou a axilidade mental".
Esther Mora asegura que clientes "con bágoas nos ollos" pasaron polo establecemento para lle brindar a súa última despedida. Mentres cruza os dedos para que apareza un pretendente para a súa tenda, oferta os seus artigos con descontos progresivos a partir do 30% para liquidar o stock. Destaca que hai xogos "para todas as idades e para todos os gustos".
Á espera de incorporarse ao seu novo posto de traballo segue abrindo de luns a venres de 10.00 a 14.00 e de 17.00 a 20.00 horas e os sábados comeza unha hora máis tarde polas mañás.
