Fontán saca billete internacional en Trasona. / FDV
O palista do Náutico O Muíño de Ribadumia, Manuel Fontán, asinou onte unha gran actuación no encoro de Trasona, en Asturias, ao lograr a vitoria no C-1 500 metros no I Selectivo Nacional de Sprint, primeira cita do proceso de selección da Federación Española de Piragüismo para a tempada de competicións internacionais de 2026.
Vitoria no selectivo nacional
O palista do Club Náutico O Muíño de Ribadumia dominou a final con autoridade e levou a vitoria cun tempo de 1:51,78, impoñéndose a Daniel Grijalba (Club Escuela Piragüismo Aranjuez), que foi segundo con 1:53,18, e a Pablo Graña (Real Club Náutico Rodeira de Cangas), terceiro con 1:53,30.
Prpraza para as Copas do Mundo
Con este triunfo, Fontán asegura a praza para representar a España en C1 500 nas dúas primeiras Copas do Mundo de Sprint, que se disputarán en maio e que servirán para seguir configurando o equipo nacional de cara ao Campionato de Europa e ao Campionato do Mundo.
Nesta mesma proba, Adrián Sieiro (Náutico O Muíño de Ribadumia) rematou na cuarta posición, cun tempo de 1:53,49, mentres Raúl Fernández (As Torres Romaría Vikinga de Catoira) logrou o segundo posto na final B, o que lle abre as portas a loitar por un posto nas embarcacións de equipo, que se definirán nos próximos selectivos do mes de abril.
Participación arousá e próximas probas
Neste selectivo tamén están a participar outros palistas arousáns, como o caso de Nerea Novo, do Náutico de Pontecesures, que rematou na novena praza do C2-500 feminino.
Na xornada de hoxe definiranse os billetes internacionais para as distancias de 200 e 1.000 metros.
