Ata un 80 % dos incendios forestais en Galicia son provocados

Territorio queimado no contorno de A Lagoa da Serpe, en Ourense, tras os incendios do verán pasado. / EFE

En Galicia, entre o 60 % e o 70 % dos incendios son provocados, porcentaxe que pode achegarse ao 80 % en épocas con condicións meteorolóxicas favorables, segundo explicou a EFE un dos coordinadores da Unidade de Investigación de Incendios Forestais (UIFO) da Xunta, Aurelio Mosteiro.

Motivacións e perfís dos incendiarios

Os motivos son múltiples e non hai un único perfil, apunta, pero na maioría dos casos son incendiarios movidos por conflitos persoais ou veciñais ligados ao uso do territorio, xa sexa residencial, agrícola, gandeiro, cinegético, de infraestruturas eléctricas ou de comunicación.

«Temos constatado que as persoas que provocan incendios intencionalmente teñen algún tipo de vinculación co medio rural, de residencia ou que desenvolven nel algunha actividade profesional ou de lecer, o que provoca que teñan un coñecemento do territorio e das súas condicións», sinala.

Características da propiedade e a incidencia dos incendios

O tipo de propiedade que hai en Galicia, Asturias e Cantabria e o uso do territorio fan que estas tres comunidades sexan, afirma, as que máis incendios intencionais rexistran.

«Hai moitas máis propiedades que noutras zonas, as parcelas son máis pequenas e nunha hectárea de superficie podemos ter 200 parcelas, cousa que noutras zonas de España non é así», explica.

Casos de piromanía e métodos de investigación

En Galicia tamén hai casos de piromanía, pero en porcentaxes baixas, do 3 % ou do 4 %, e é moito máis doado identificalos porque provocan o incendio a calquera hora do día, con moitos focos e a pesar de que as condicións meteorolóxicas non sexan favorables para que se estenda.

Os incendiarios, pola contra, si que estudan facelo en condicións favorables.

O punto de inicio, a ausencia de causas naturais ou accidentais que poidan explicar a ignición, que se produza nunha zona con incendios reiterados durante un período de tempo ou a presenza de artefactos incendiarios ou acelerantes son as «pistas» que seguen os axentes da UIFO.

«Todos estes parámetros valorados de forma conxunta permítennos concluir que a orixe do incendio responde a unha causa intencional», conclúe Mosteiro.