A afección do Celta impulsa Balaídos cara aos oitavos

Vigo lánzase cara outra gran noite europea de fútbol.

Miles de persoas gozan xa nos arredores do estadio de Balaídos da previa do Celta-Paok desta noite que decidirá o pase aos oitavos de final da Europa League.

As distintas peñas da grada de animación convocaron ao celtismo ás 18.30 horas para «outra noite tola» na que esperan facer bo o 1-2 do partido de ida na Toumba.

Tráfico e ambiente previo

A eles súmanse os centos de condutores atrapados nas retencións rumbo ao estadio.

Segundo sinalan algúns, a ruta por Antonio Palacios e Castrelos presenta un «tráfico inaudito» ao xuntarse co habitual destes xoves.

Pola súa banda, o Celta quixo poñer o broche a esta gran noite europea cun xesto para teñir Balaídos de celeste.

O club colocou máis de 20.000 bandeiras por todo o estadio, de modo que cada afeccionado atopará no seu asento este agasallo para ondelo durante o partido.

A afección visitante

Como convidados de excepción estarán, por segunda vez esta tempada, os seguidores do PAOK.

En torno a 600 afeccionados gregos desprazados a Vigo para animar ao seu equipo concentráronse ás 19.15 horas diante do Hotel Bahía e, desde ese punto, están a ser escoltados a pé ata o estadio.

Este operativo implicará cortes de circulación na Avenida de Beiramar e nas rúas polas que discorra o percorrido do grupo de seguidores do PAOK.