Baseado en feitos observados e verificados directamente polos nosos xornalistas ou por fontes informadas.

A Fiscalía considera que os seus actos poderían ser constitutivos "ben dun delito de acoso sexual, ben dun delito de abuso no exercicio da función pública".

A Fiscalía Provincial de Lugo presentou unha querela contra o alcalde de Monforte e expresidente da Deputación de Lugo, José Tomé, tras recibir unha denuncia particular por feitos presuntamente delituosos cometidos contra unha muller en setembro de 2025, segundo informou o propio ministerio público.

A Fiscalía de Lugo considera nun comunicado que os feitos denunciados, con carácter provisional e sen prexuízo do resultado que poida arroixar a investigación penal, poderían ser constitutivos "ben dun delito de acoso sexual, ben dun delito de abuso no exercicio da función pública".

De feito, considera a Fiscalía que os feitos "están suficientemente determinados e posúen indicios fundados de criminalidade" para exercer de forma inmediata a acción penal, mediante a apertura duns dilixencias de investigación preprocesual (DIP) e a interposición de querela.

José Tomé solicitou a baixa de militancia no PSOE o pasado mes de decembro e presentou a súa dimisión como presidente da Deputación de Lugo como consecuencia dunha denuncia por un suposto caso de acoso sexual a través da canle interna da formación política.

En cambio, mantívose como alcalde de Monforte de Lemos, non adscrito, aínda que co apoio do grupo municipal do PSdeG-PSOE, e tamén conservou a súa acta como deputado provincial -tamén como non adscrito-.