O catedrático de Dereito Mercantil e novo valedor universitario, Julio Costas Comesaña. / Duvi
Tras un primeiro intento fallido, a UVigo xa ten novo valedor, o catedrático de Dereito Mercantil Julio Comesaña Costas. Substituirá a Esther Pillado, que rematou a súa etapa en xaneiro tras cinco anos no cargo, ao obter o respaldo maioritario do Claustro na segunda votación (66 papeletas a favor, 4 en contra e 2 en branco) durante a sesión extraordinaria celebrada esta mañá no campus de Pontevedra.
Costas presentouse ante os claustrais como candidato único e de consenso, despois de que na primeira votación para substituír a Pillado celebrada o pasado decembro ningún dos dous aspirantes, Maribel Doval e Xosé Manuel Cid, obtivese o respaldo necesario.
Antes da votación, o catedrático resumiu a súa traxectoria académica e profesional. Vencellado á UVigo desde 1989, Costas foi vicedecano das facultades de Económicas e Xurídicas, así como director do departamento de Dereito Privado e, actualmente, responsable da área de Dereito Mercantil.
Ademais foi membro da Comisión Nacional de Competencia e da Comisión de Propiedade Intelectual do Ministerio de Cultura e forma parte do Xurado de Autocontrol.
Costas recoñeceu o traballo de Esther Pillado e a súa intención de relevala no cargo con «espírito construtivo». Comprométese a manter a independencia de criterio, a proximidade ás persoas, a confidencialidade e a mediación como «vía preferente» para a resolución de conflitos.
«É unha instancia de garantía, acompañamento e mellora institucional. A súa forza non está na imposición, senón na súa capacidade de convencer e propoñer solucións viables», salientou.
Defendeu que este órgano da UVigo é «un aliado» na defensa dos dereitos, na mellora da institución e no avance cara a unha universidade máis xusta, inclusiva e coherente cos seus valores. E marcou como retos principais o seguimento dos casos abordados, a inclusión nas memorias dos ámbitos con actuacións exemplares e daqueles que precisan mellorar, o fomento dunha cultura de prevención de conflitos e unha escoita activa de toda a comunidade.
