Un instante do encontro / Iñaki Osorio / Roi Cruz

O campus de Ourense non fica cos brazos cruzados ante esta fenda de xénero tan marcada nas enxeñarías, e leva traballando en campañas e iniciativas de promoción das carreiras STEM entre as mulleres case desde que existe esta fenda. Claro exemplo diso é «Exxperimenta en feminino», a feira tecnolóxica que organizan desde hai nove anos para visibilizar o talento que hai tanto nas investigadoras como nas alumnas deste tipo de titulacións.

Por outra banda, a UVigo celebrou onte no Edificio Politécnico un evento polo 8M, destinado a poñer en valor o papel de moitas mulleres no sector tecnolóxico. Organizado xunto ao Google Developer Group de Ourense (unha comunidade mundial de apaixonados das tecnoloxías con presenza na provincia), o encontro trouxo a Rocía Mojica, enxeñeira investigadora en Gradiant e membro de #WomensTechmakers, que destacou o pouco papel que tiveron as mulleres no mundo das probas: «Durante moitísimos anos houbo experimentos que non teñen en conta as mulleres. Por exemplo, os bonecos dos cintos de seguridade, que aínda máis de 100 anos despois de que a esposa de Karl Benz fixera a primeira viaxe en coche, aínda se fan con modelos de home».

Por outra banda, María Lourdes Borrajo, coordinadora do grao de Intelixencia Artificial, sinalou que «as mellores solucións, polo menos no ámbito industrial, xorden cando pensan homes e mulleres xuntos. Temos unha anatomía e unha maneira de enfocar as cousas diferente, e son necesarias todas as visións para non esquecer nada nunha solución». Por último, Josefina Alonso Mocelo, consultora e directora de operacións de Dihgigal, destacou os novos perigos que pode causar unha tecnoloxía innovadora inmersa nunha fenda de xénero: «En intelixencia artificial, un sesgo de xénero pode ser dramático: se os datos ignoran as mulleres, os algoritmos tamén poden ignoralas ou incluso penalizalas».