A alfombra gris dos premios Mestre Mateo despregouse este venres en Lugo para acoller a xuntanza dos finalistas e facer entrega dos galardóns especiais desta 24ª edición. Algúns dos rostros máis importantes do audiovisual galego estiveron presentes, nun adianto do que se vivirá o próximo 21 de marzo no auditorio Fuxan os Ventos.
"Benvidos a Lugo". Con esta frase tan significativa comezou a súa intervención a presidenta da Academia Galega do Audiovisual, Lucía Veiga, quen aproveitou para destacar o "pracer" de celebrar o encontro no Museo Interactivo de Historia de Lugo (MIHL), un espazo que combina "vangarda, arquitectura e paisaxe", en consonancia co gran momento que está a vivir o audiovisual galego.
"En Galicia temos un audiovisual aberto, valente e competitivo. Moi capaz de contar historias que nos representan", asegurou Lucía Veiga, presidenta da Academia Galega do Audiovisual.
A actriz coruñesa subliñou o "talento e paixón" que sosteñen o sector, e lembrou que a produción deste ano demostra que Galicia conta cunha industria creativa "aberta, valente e competitiva", capaz de contar historias que nos representen dentro e fóra da comunidade. Tamén agradeceu o traballo dos creadores, produtoras e equipos técnicos e artísticos, e felicitou os finalistas por contribuír a construír o futuro da profesión.
"Hoxe estamos aquí grazas ao esforzo colectivo de todos e todas nós", dixo, antes de dar paso ás autoridades que tomaron a palabra durante o acto: Jacobo Sutil, director de Agadic; Iria Castro, deputada de Cultura, Patrimonio e Normalización Lingüística; e Maite Ferreiro, concelleira de Cultura.
Todos eles coincidiron en destacar o "orgullo" de que Lugo sexa sede dos galardóns por primeira vez en case un cuarto de século, subliñando o valor do sector como motor cultural e económico e agradecendo o traballo da Academia Galega do Audiovisual na organización dos premios. Ao mesmo tempo, convidaron os asistentes a vivir a cidade, a súa gastronomía, o patrimonio e a hospitalidade dos seus veciños.
A provincia luguesa tamén foi reivindicada como berce e referente do talento audiovisual. Non en van é a "casa" de Dhogs, a película máis premiada na historia dos Mestre Mateo, dirixida polo meirego Andrés Goteira; do naviego Oliver Laxe, para quen houbo palabras de recordo e agarimo tras o éxito de Sirāt, convertida a pasada semana nunha das grandes triunfadoras dos Goya e primeira película galega nomeada aos Oscar; ou da vilalbesa Margarita Ledo.
A continuación, a vicepresidenta da Academia Galega do Audiovisual, a barallesa Carmen Méndez, conduciu o momento de entrega dos premios especiais. O primeiro foi o Abanca ao impulso da sustentabilidade, que recibiu a serie de debuxos Bibopalula por integrar "de forma coherente, creativa e responsable" os valores da sustentabilidade tanto na súa proposta narrativa como na súa vocación pedagóxica.
O segundo foi o premio Deleite á promoción da lingua, que recaeu na serie web Pipo polo seu labor na creación de contidos audiovisuais que achegan o galego ás novas xeracións dun xeito "natural, creativo e próximo". Creada por Andrés Mahía e dirixida por Laura Mahía, a serie conta a historia de Berta, unha nena de seis anos que atopa no patio da casa a Pipo, un pequeno extraterrestre que cae do ceo e que decide agochar no seu cuarto.
O Martín Códax Rías Baixas, Fillo do Atlántico recaeu no filme As liñas descontinuas —que acumula 11 candidaturas nos Mestre Mateo, ao igual que Sirāt— pola súa "sensibilidade e capacidade de proxectar unha Galicia auténtica e contemporánea", na que a música ocupa un papel esencial. Dirixido pola directora pontevedresa Anxos Fazáns e protagonizado por Mara Sánchez e Adam Prieto, narra o encontro inesperado entre Bea, unha muller de 50 anos, e Denís, un rapaz trans de 28, que transforma as súas vidas.
"Grazas ao público por premiar o filme Antes de Nós. Se á xente lle gusta, iso adoita significar que hai un bo traballo detrás", dixo o guionista rabadense Pepe Coira.
O último galardón da noite, o Premio Especial do Público Galicia Calidade, recaeu na longametraxe Antes de Nós, outra das favoritas da edición, con 18 nominacións e co actor Xoán Fórneas, de Castro de Rei, na pel de Castelao. Foi a primeira vez que o público puido votar directamente, acadando máis de 2.000 participacións, un feito que o seu guionista, o rabadense Pepe Coira, agradeceu lembrando que "cando á xente lle gusta algo é porque hai un moi bo traballo detrás".
O acto rematou coa tradicional fotografía dos finalistas, reunidos enriba do escenario do MIHL e, como non podía ser doutro xeito, ao berro de "Viva Lugo!". Unha cidade que xa quenta motores para converterse na sede da gran festa do audiovisual galego.
