O duelo máis esixente para un equipo que quere coller velocidade de cruceiro na zona de play off. O Lugo, que atravesa unha serie de catro partidos sen perder, visita desde a cuarta posición o Heliodoro Rodríguez López, onde lle agarda este sábado (16.15 horas, TVG2) o poderoso líder, un Tenerife que marcha imparable cara ao ascenso directo a Segunda División.
É o chicharreiro o conxunto que máis esixe da categoría. Ocupa o primeiro posto desde a segunda xornada. Desde esa posición viu como ningún equipo era capaz de seguir un ritmo constante de puntos. As súas primeiras seis xornadas foron vitorias para marcar un territorio que ningún outro equipo soubo pisar. Na actualidade, o cadro dirixido por Álvaro Cervera suma 58 puntos, nove máis que o Celta B, segundo, e 19 máis que o sexto, que marca a zona que quedaría fóra da loita polo ascenso.
Só catro equipos sumaron os tres puntos ante os canarios nas 26 xornadas disputadas ata o momento. Pero tres deles, Unionistas (0-2), Athlétic B (0-1) e Rácing de Ferrol (0-1), fixérono no escenario que o Lugo visitará neste partido.
Os tinerfeños atravesan o momento de máis dúbidas da tempada, xa que, tras enlazar sete vitorias, nos últimos catro partidos de Liga só gañaron ao Arenteiro en O Espiñedo (0-1) cun gol de penalti no minuto 97. Igualaron (0-0) en Lezama ante o Athlétic B, caeron na casa fronte ao Rácing de Ferrol e na última xornada igualaron 2-2 fronte ao Avilés no Heliodoro.
A isto aferrarse o Lugo para seguir consolidando a súa posición na zona de play off. Gañar en Tenerife suporá unha inxección de moral para os homes de Yago Iglesias, que buscarán uns puntos que poden ser fundamentais para manterse entre os cinco mellores e incluso mirar cara á segunda praza.
Asaltar o subcampionato do Grupo I permitiríalle afrontar o play off con vantaxe de campo e daríalle o pase en caso de empate na eliminatoria.
Para iso, Yago Iglesias apelou á "personalidade" de poder realizar o seu xogo, ademais de reducir as enormes virtudes que ten o cadro canario, hábil á hora de facer pagar os erros alleos, transitar e ser efectivo nas xogadas de estratexia.
Tamén terá que buscar a pegada ofensiva, xa que os chicharreros apenas encaixan ao carón do seu público.
Para sumar de tres, Yago Iglesias podería apostar polo once habitual das últimas semanas. Marc Martínez apunta a estar baixo paus, mentres que en defensa recupera a un José Amo que é capitán xeral na zaga e visita ao seu exequipo. Ao seu carón estaría un consolidado Ibaider Garriz. Nos laterais, coa baixa de Diego Caballo, seguirá Pere Haro na esquerda, mentres que as molestias musculares de Yago Rodríguez devolverán ao once a Iago López pola ausencia do vigués.
Por diante parecen seguros Balboa e Kevin Presa na medular pola baixa de Perera. Sen Pastrana, lesionado, os laterais serían para Jorge na dereita e Gallar na esquerda, mentres Neco Celorio ocuparía o posto na media punta. No caso de que a aposta na banda sexa Samanes ou Lago Júnior por Celorio, Gallar pasaría a xogar por dentro. Arriba, Reniero e o seu bo momento de cara ao gol podería mantelo no once por diante de Iker Unzueta.
