Os sanitarios xa non puideron facer nada polo condutor, veciño de Lugo. A súa nai, que viaxaba no asento do copiloto, tivo que ser excarcerada polos bombeiros de Vilalba.
Unha colisión por alcance na que se viron implicados tres vehículos na noite deste sábado na A-6 ao seu paso por Guitiriz saldouse cun home de 57 anos falecido e unha muller ferida de gravidade, que foi evacuada ao HULA nunha ambulancia de soporte vital avanzado. Ambos, veciños de Lugo, nai e fillo, viaxaban nun dos turismos implicados no sinistro, ocorrido ao fío das nove da noite na autovía sentido Madrid.
Nos outros dous coches ían unicamente os seus condutores, un dos cales sufriu feridas leves, polo que foi evacuado a un centro hospitalario por precaución, mentres que a outra condutora foi revisada polos sanitarios, sen que precisase ser evacuada.
A ambulancia de soporte vital básico do 061, xunto con persoal médico do PAC guitiricense e Protección Civil de Guitiriz foron os primeiros en chegar ao lugar do accidente. Alí lograron sacar ao condutor do vehículo forzando a súa porta, pero, pese aos seus esforzos, só puideron certificar o seu falecemento. É o décimo morto nas estradas lucenses no que vai de ano. A súa acompañante tivo que ser excarcerada polos bombeiros do parque comarcal de Vilalba e o GES de Friol-Palas.
Tráfico, que mobilizou varias patrullas, investiga as causas do sinistro, no que ao parecer un vehículo impactou por detrás co coche no que viaxaba a vítima mortal no punto quilométrico 530, moi preto do acceso á A-6 de Parga, véndose implicado na colisión un terceiro turismo.
Para que os servizos de emerxencia puidesen traballar, foi necesario cortar ao tráfico varios centos de metros dun dos carrís de circulación da autovía en sentido Madrid, regulando a circulación polo outro.
A presenza de restos na calzada como consecuencia do forte impacto obrigou tamén aos servizos de conservación de estradas a limpar un bo tramo de vía, dado que a colisión inicial se produciu metros antes do lugar no que finalmente se detiveron os vehículos implicados.
O sinistro mobilizou a persoal de Urxencias Sanitarias, dos Bombeiros de Vilalba, GES de Friol-Palas, Garda Civil de Tráfico, Protección Civil de Guitiriz e Conservación de Estradas.
