O gasóleo sobe e encarece os servizos das cooperativas agrarias

Vacas nunha explotación de Escuadro, en Silleda. | BERNABÉ/AMANDA CASTRO

Dentro dun mes comeza en Deza a campaña do primeiro corte de herba para ensilado, e se por entón continúa o conflito bélico no Oriente Medio, as tarifas da maquinaria serán bastante máis altas que as do ano pasado. Ante a escalada de prezos do combustible, varios traballadores autónomos xa contactaron coas cooperativas para anunciarlles que subirán os seus prezos por hora para poder cubrir ese aumento de gasto. O presidente de O Rodo, Jesús Montes, apunta que «con ese incremento do custo do servizo, non queda outra que subirlle o prezo aos socios». Así, se unha colleitadora podía cobrar antes 20 euros por cada hora de traballo, co encarecemento do diésel pode chegar aos 36. Moito máis alto pode ser o desembolso por un carro mesturador «que pode chegar aos 1.500 euros por mes», ao empregar arredor de 140 litros diarios de diésel.

Os traballos de abonado e sementeira son imprescindibles para as explotacións gandeiras, porque non sería viable importar todo o alimento para o gando e porque ademais varias liñas da Política Agraria Común cobren prácticas agrarias sostibles. Os aranceis anunciados por Estados Unidos semanas atrás, a sombra do Mercosur e agora a guerra converten no máis difícil aínda adquirir alimento para a cabaña gandeira ou para fabricar penso a un prezo que deixe marxes de beneficio. «Dende o inicio do conflito, xa subiu a cotización do trigo en Bolsa, e suspendeuse a do nitróxeno», explica Montes. Os fertilizantes nitrogenados empregan o gas natural como materia prima e, a diferenza do gasóleo ou da gasolina, os maioristas non adoitan contar cunha reserva estratéxica destes abonos. Transportar fertilizantes ou cereal encarecerase nas próximas semanas, en vista de que un camión, por exemplo, «ten un tanque de 1.000 litros, e consume 40 cada 100 quilómetros». Este xoves, encher eses 1.000 litros podía custar entre 1.439 e 1.786 euros. O luns a forquilla era un pouco máis modesta: entre os 1.330 e os 1.458, case 300 euros menos.

Durante estes primeiros días, sobre o prezo do combustible e por extensión de calquera produto pesa máis a incertidume que o desabastecemento. No caso do fertilizante, o curioso é que o que chega a terras españolas non procede da zona do conflito, senón de Rusia.

O presidente de O Rodo engade que este venres «tiñamos un pedido a Repsol, e comunicounos que non saberían cando nolo poderían servir. No caso da gasolineira da cooperativa, temos que revisar o prezo pedido a pedido, porque ás veces vén 3 céntimos por litro máis caro do que o estamos vendendo». A continua actualización de prezos explica a alza do combustible tanto nas compañías como nas cooperativas, gasolineiras de baixo prezo e, en menor medida, estacións libres.

Outro presidente de cooperativa, neste caso Manuel Fernández, de Xuncoga, confiaba en poder manter as tarifas do ano pasado para os seus socios, aínda que teme que «os camioneiros que van ao porto da Coruña buscar cereal para facer penso nos pidan un aumento no pagamento do transporte». A entidade de segundo grao celebra este xoves (ás 12.30 horas) unha reunión informativa cunha representante do proxecto Desarrollos Bioenergéticos Agolada, promotora dunha planta de biometano no municipio.

O sector primario terá que afrontar unha suba de custes na producción de forraxe e penso, ao mesmo tempo que cobra menos pola carne que ceba. Por que? Porque os transportistas de gando van a subir os seus servizos aos tratantes e intermediarios que, deste xeito, veranse forzados a aboar a carne de tenreira a un prezo inferior ao actual para manter os seus marxes de beneficio. Isto verase nas próximas semanas na poxa de Silleda, referencia a nivel autonómico.

Un dos seus tratantes e tamén gandeiro, Alberto Rielo, explicaba que «un porte de gando de Ale