A impopularidade de Macron pásalle factura

O presidente francés, Emmanuel Macron, nun acto no Elíseo. / Europa Press/Contacto/Lionel Urman

Emmanuel Macron é o presidente máis impopular da historia de Francia, con apenas un 23% de aceptación por parte dos seus cidadáns. Unha impopularidade que xa non é só un problema interno.

A inestabilidade política que marcou Francia desde que o presidente decidiu disolver a Asemblea Nacional no verán de 2024, a tan só unhas semanas dos Xogos Olímpicos, xerou fóra do país unha grande desconfianza sobre a súa capacidade para liderar. A súa chegada ao Palacio do Elíseo en 2017 creou grandes expectativas. Macron presentouse como un político que rompía todos os esquemas; o presidente máis novo con ideas novas e coa ambición de volver a situar a Francia no máis alto do panorama internacional.

Con todo, o seu proxecto de devolver a ‘grandeur’ a Francia foi perdendo forza co paso do tempo, empezando pola morte lenta da ‘Francafrique’; en 2020 Francia perdeu en Malí, en 2022 en Burkina Faso e en 2023 en Níxer, cando retirou as súas tropas tras unha serie de golpes de estado que se traduciron en gobernos contrarios á presenza da antiga metrópole. Outro dos seus proxectos fallidos foi a xestión da crise migratoria no Canal da Mancha, onde Francia acabou asinando un acordo co Reino Unido que numerosos analistas consideran desfavorable para Francia. Máis recentemente, Macron tampouco conseguiu reunir o apoio suficiente entre os países europeos para frear o acordo de libre comercio Mercosur.

A guerra de Ucraína chegou como unha oportunidade para que o presidente francés puidese levantar os índices de popularidade e puidese demostrar as súas habilidades de liderado. Durante os primeiros meses do conflito, o seu papel de mediador conseguiu convencer parte do electorado, xerando un «efecto bandeira», pero á medida que a guerra foi avanzando e os problemas internos do país se agravaron, os franceses volveron a cuestionar a súa capacidade de xestión. “Dedica máis tempo a outros países que ao seu propio”, di François, veciño do distrito 17 de París.

Unha crítica que respalda parte da cidadanía, especialmente ante informes como o publicado en 2023 polo Instituto Nacional de Estatística de Francia, no que se amosa a taxa máis alta de pobreza no país desde hai 30 anos, con arredor de 10 millóns de persoas por baixo do 60% da renda mensual media (1.288 euros). A perda de poder adquisitivo dos franceses e o aumento dos problemas de inseguridade e salubridade nas súas rúas xerou que a impopularidade do presidente medrase de portas para dentro.

Paradóxicamente, no plano europeo, Emmanuel Macron é o líder máis popular na Unión Europea con un 46% de opinións positivas entre os cidadáns, superando a outros líderes como Georgia Meloni con 42% ou Pedro Sánchez con 33%, segundo unha sondaxe publicada por Euractiv. Os líderes europeos valoran positivamente a súa intención de liderar cumbres co fin de buscar un consenso sobre os grandes desafíos aos que se enfronta o vello continente, desde a seguridade enerxética ou as ameazas arancelarias ata a defensa común.