Postos da Praza de Abastos de Ourense, estupefactos polo traslado

O interior do edificio provisional da praza de abastos na Alameda, á espera da reforma. / Iñaki Osorio

Os comerciantes da Praza de Abastos número 1 de Ourense afirmaron sentirse «estupefactos» e «desconcertados» ante as noticias sobre a elaboración dun proxecto de traslado de xeito subsidiario por parte do Concello.

Os asociados afirman que o proxecto de reforma e traslado que están a levar a cabo está en fase de rematar, e que por iso non entenden as declaracións de Gonzalo Pérez Jácome, alcalde de Ourense, no último pleno celebrado este venres.

Debate no pleno municipal

Foi no turno de rogos e preguntas cando o portavoz do BNG, Luis Seara, preguntou pola retirada dun acordo sobre a revogación do desafiuzamento dos praceiros da orde do día da Xunta de Goberno Local, ao que Jácome respondeu que «un xurídico avisounos de que non lle parecía boa idea».

Ese punto ía da man dunha proposta para executar subsidiariamente a elaboración do proxecto de reforma da praza, sobre o que o alcalde quixo estenderse alegando unha suposta inactividade dos comerciantes.

«Xa que vostedes non fan o proxecto, subsidiariamente vai facelo o Concello, e ademais vai proceder a executar a obra. Logo veremos quen a vai pagar», afirmou o rexedor.

Ao día seguinte, o alcalde explicou nas súas redes sociais que este proxecto paralelo custaría en torno a 800.000 euros. Ademais, asegurou que se a Xunta de Galicia e a Deputación de Ourense (que expresaran dúas semanas atrás a súa «man tendida» ao Concello para cofinanciar xunto cos praceiros a súa recuperación) non pagasen esta reforma a cargo do Concello, denunciarían o que definen como unha «prevaricación de libro».

Resposta dos comerciantes

Tras estas palabras, os comerciantes explicaron nun comunicado que o proxecto de reforma que lles encargou o xulgado tras o auto publicado o pasado setembro (que lles denegaba medidas cautelares) está «a rematarse», e culpan ao Concello de que o operativo de traslado se retrasase pola súa desidia.

Segundo afirman, a corporación municipal negouse a facilitar os documentos necesarios para a elaboración do proxecto, como un prego de prescripcións técnicas ou unha memoria de calidades.

Por outra banda, expoñen que hai «silencio» e falta de resposta «ante os avances do proxecto entregados no concello».

Acceso ao edificio e situación actual

Os praceiros reprochan tamén que lles negaron o acceso ao edificio da Praza de Abastos en repetidas ocasións, ao que lograron entrar esta semana «tras meses de espera».

Nesta visita, realizada polo equipo técnico da praza, puideron comprobar que o edificio «quedou esteticamente precioso, pero faltan todos os servizos necesarios».

De feito, afirman que o proxecto de reforma afronta unha complexidade adicional por este mesmo feito: «Na actualidade, o edificio é practicamente paredes, sen auga, electricidade, desaugues, montacargas, gas, saídas de fume e un longo etcétera», expresa o comunicado publicado onte.

Litixio e disposición ao acordo

Por outra banda, os comerciantes cuestionaron que «encaixe legal» teñen estas últimas declaracións de Jácome no litixio no que se atopa inmersa a situación da Praza de Abastos.

Como o propio alcalde recordou nas súas redes sociais, esta cuestión mantén vivos 2 pleitos a día de hoxe, e a última actualidade xudicial foi que o xulgado admitiu as medidas cautelares solicitadas polos praceiros, despois de que o conce