O presidente do Goberno, Pedro Sánchez, comunicou este venres un paquete de medidas que inclúe unha bonificación de 20 céntimos por litro de combustible aplicada no surtidor para os sectores da pesca, a agricultura e o transporte. A decisión adoptouse nunha reunión extraordinaria do Consello de Ministres en La Moncloa e forma parte dun «plan integral» que mobiliza 5.000 millóns de euros e contempla 80 actuacións, segundo avanzou o propio titular do Executivo.

Que inclúe a medida e cando entra en vigor

A axuda aplicarase como desconto directo no prezo do combustible nos puntos de subministro e activarase unha vez se publique a orde no Boletín Oficial do Estado, previsto para este sábado. O Executivo deseñou a intervención co obxectivo de conter o impacto inmediato da escalada de prezos tras o conflito en Oriente Medio, que o Goberno cualificou como consecuencia da «guerra ilegal en Irán» e que está tensionando as cadeas loxísticas e os custos enerxéticos.

Ademais do desconto por litro, o paquete inclúen medidas destinadas a vixiar marxes e beneficios extraordinarios no sector enerxético e outras actuacións para amortecer o encarecemento da cesta da compra. O Goberno destaca a transversalidade do plan: non só pretende aliviar custos directos de produción, senón reducir a incidencia nos prezos ao consumidor final.

«Saír máis forte», foron as palabras empregadas por Pedro Sánchez para definir o obxectivo do conxunto de medidas, segundo explicou na súa comparecencia tras a reunión do gabinete.

Na comparecencia o presidente subliñou que se trata dun escudo económico e social de gran envergadura, e xustificou a rapidez da intervención ante unha subida do gasóleo mariño que, no caso de Galicia, se duplicou en semanas e supera a barreira do euro por litro en portos como Vigo ou Burela.

A petición do sector e o desencanto coa cifra anunciada

As confrarías e a frota galega reclamaran con insistencia unha rebaixa maior: na reunión mantida esta semana co ministro de Agricultura, Pesca e Alimentación, Luis Planas, a petición formal ascendía a un mínimo de 30 céntimos por litro para o gasóleo marítimo. Os mariñeiros advertiron que o sobrecusto no combustible ameaza con provocar paros e a paralización da actividade, especialmente entre a frota de cerco e o arrastre que operan en augas galegas.

A resposta do Goberno, máis moderada do solicitado polo sector, xerou frustración nalgunhas confrarías e patróns maiores consultados por este xornal. Non só era a contía o que estaban demandando: tamén pediran modificacións nas axudas de minimis —que as perciban por barco en vez de por empresa e que o teito suba do actual límite de 40.000 a 400.000 euros—, a supresión temporal do IVA sobre os produtos do mar, a redución de cotizacións á Seguridade Social e unha maior flexibilidade nas cotas pesqueiras, elevando a interanual do 10% ao 25%.

No campo e no transporte, a situación é igualementetensa. Agricultores e gandeiros viron dispararse os custos de produción —combustible para tractores e transporte de insumos— mentres o transporte de mercadorías por estrada denuncia marxes cada vez máis estreitos e risco para a viabilidade de pequenas e medianas empresas do sector.

Impacto en Galicia e posibles efectos a medio prazo

Galicia, cunha economía moi vinculada ao mar e cun tecido agrogandeiro significativo, é especialmente sensible a estes movementos. Os portos de Vigo e Burela non son só puntos xeográficos: son centros de actividade onde a subida do gasóleo ten e