O presidente da Mancomunidade, José Manuel Rey Varela, acompañado dos alcaldes da entidade, reuniuse esta mañá no Concello de Ferrol co director de Augas de Galicia, Roi Fernández, para analizar a situación actual do abastecemento de auga da comarca. O encontro prodúcese nun contexto de ausencia de precipitacións desde marzo e tralo verán máis quente en case 70 anos.
Segundo os datos analizados na reunión, o encoro de As Forcadas atópase actualmente ao 40,08 % da súa capacidade, con aproximadamente 3,96 hectómetros cúbicos almacenados. Dos 28 días de setembro, só en seis houbo precipitacións, que non bastaron para frear o descenso das reservas. Se non aumentan as choivas ata o 26 de outubro, o encoro situaríase aproximadamente no 26,81 % da súa capacidade, o que obrigaría a abrir os condutos inferiores para garantiren o fornecimento.
As tomas superiores da presa continúan operativas e os controis realizados permiten garantir que a auga, tralo tratamento na ETAP de Catabois, é apta para o consumo. Estase a realizar unha monitorización regular dos parámetros de calidade da auga bruta e os informes técnicos non prevén neste momento episodios de incremento de trihalometanos.
Medidas preventivas e redución do consumo
Rey Varela lembrou que os concellos da Mancomunidade e Emafesa comezaron a adoptar medidas preventivas xa en xullo, aproximadamente un mes antes da declaración de prealerta por parte da Xunta de Galicia. Entre elas figuran a redución de regas e baldeos municipais, o corte temporal do fornecimento nas fontes ornamentais, o reforzo do control de posibles fuxidas e a petición á cidadanía de reduzir os consumos non imprescindibles. O Concello de Ferrol publicou ademais, o 29 de xullo, un bando municipal con recomendacións para reducir o consumo doméstico. Segundo os datos municipais, desde a adopción destas medidas o consumo global reduciuse en aproximadamente 14.000 metros cúbicos.
Os alcaldes acordaron iniciar un estudo mancomunado de posibilidades de incremento de captación de auga tanto en As Forcadas como doutras opcións que poidan reducir a presión sobre o encoro e as perdas de auga nos diferentes concellos.
Tubería de As Pías
A reunión permitiu tamén avanzar na situación da tubería que atravesa a ponte de As Pías e que abastece a Fene, Ares e Mugardos. Esta tubería presenta desde fai anos unha fuxida na válvula de baleirado e signos de corrosión en determinados tramos, e leva oito anos con perdas. Os concellos afectados propoñen un modelo de financiamento compartido con participación de Augas de Galicia e a Deputación da Coruña. Durante o encontro, Augas de Galicia trasladou a súa disposición a participar no financiamento da actuación. O seguinte paso será presentar formalmente a proposta ao presidente da Deputación da Coruña, cuxa entrevista se solicitou hoxe mesmo.
“Non podemos decidir cando vai chover, pero si podemos decidir como utilizamos a auga da que dispoñemos”, sinalou Rey Varela, quen insistiu en manter o consumo responsable mentres non se produzan precipitacións suficientes.
Fonte: Concello de Ferrol
