Vehículo da Policía Local de Cangas dotado de cámara. | G.NÚÑEZ

Favorecer a rotación de vehículos en zonas comerciais como a contorna da praza de abastos e restrinxir a circulación rodada e os aparcadoiros en arredor dunha ducia de rúas do Casco Vello, o barrio do Forte ou Nazaret.

No enésimo intento de regular o tráfico no centro urbano, o Concello de Cangas aposta pola instalación de cámaras fixas con lector de matrículas e outras nos vehículos policiais dotadas dun sistema de control de tempo que permitirá denunciar os infractores que superen o límite fixado e remitirlle as multas a través do ORAL.

Para valorar a súa implantación, xa mantivo contactos con colectivos veciñais e comerciantes, empresas que instalan esta tecnoloxía e municipios que a teñen implantada, como A Illa de Arousa, onde a alcaldesa, Araceli Gestido, e mandos da Policía Local acudirán nas vindeiras semanas para comprobar o funcionamento e concretar a súa implantación a curto prazo.

Restricións ao tráfico rodado no centro urbano de Cangas. | G.NÚÑEZ

Debate recorrente sobre o tráfico en Cangas

A necesidade de controlar o tráfico ponse enriba da mesa con certa periodicidade dende hai un cuarto de século, aínda que o modelo e a súa implantación nunca acaban de concretarse.

Recentemente, con motivo da humanización das rúas Eduardo Vincenti e Montero Ríos, o goberno local retomou a fórmula de «zona azul», xa sexa gratuíta ou de pago, para regular o aparcadoiro limitando o tempo de ocupación das prazas, un sistema que se leva barallando dende que José Enrique Sotelo (PP) conquistou a Alcaldía de Cangas en 1999, sen que acabe de callar.

Colectivos sociais como a asociación do Casco Vello «Fonte Garrida» demandan solucións ao problema do tráfico e accesos, e as vendedoras da praza de abastos reiteraron esta mesma semana, nunha reunión coa rexedora, a necesidade de tomar medidas como a rotación de vehículos para atraer clientes ao mercado municipal.

O modelo da Illa de Arousa como referencia

O modelo implantado na Illa de Arousa semella convencer a políticos e técnicos, que xa concretaron unha visita para coñecelo a fondo e adaptalo a Cangas co fin de favorecer a rotación, reducir a conxestión e mellorar a organización do espazo público.

As primeiras medidas pasarían por instalar e poñer en marcha unha serie de cámaras con lector de matrícula para o control de determinadas rúas, priorizando as que vertebran o casco histórico e os barrios de O Forte e Nazaret, sen descartar outras da contorna urbana que deberían ser perimetradas, sinalizar as restricións a vehículos non autorizados e outras limitacións.

Non se fixou o número, pero manéxase unha cifra non inferior á ducia de cámaras para poñer en marcha o servizo.

Vehículo da Policía Local de Cangas dotado de videocámara. / G.Núñez

Funcionamento e sancións do sistema

Basicamente, o sistema funciona rexistrando as matrículas dos vehículos que acceden a ditas zonas, comproba que figuran entre os autorizados na base de datos e reportan a incidencia para a súa tramitación e multa, se é o caso.

A Policía Local contaría tamén con cámaras nos seus vehículos e lectores de man para rexistrar tempos de estacionamento e sancionar os excesos.

Na Illa aplícanse multas de 200 euros (que se reduce á metade por pronto pago), pero polo de agora non se concretou a contía das mesmas se se aplica esta fórmula en Cangas.

A intención é mellorar a mobilidade no casco urbano, favorecendo especialmente aos residentes e comerciantes, e dar un tempo de adaptación no que se tramitarían avisos aos infractores, sen aplicar sancións.

Obxectivos e resultados na Illa de Arousa

Mellorar a mobilidade, reducir a masificación turística e protexer a calidade de vida dos veciños foron obxectivos declarados polo Concello da Illa de Arousa para implantar, en xuño de 2025, o sistema que Cangas quere adaptar.

Desde entón, en preto de medio cento de rúas do municipio do Salnés só poden circular vehículos de persoas residentes e empadroadas, propietarios de segundas residencias (con autorización previa), servizos de emerxencia e reparto e clientes de aloxamentos ou comercios que comuniquen a matrícula con antelación.

O control faise mediante cámaras de lectura de matrículas que rexistran os accesos e as infraccións sanciónanse con ata 200 euros de multa.