O Colexio de Fonseca de Santiago de Compostela acolleu unha nova edición do International Students Welcome Day, a xornada coa que a Universidade de Santiago de Compostela (USC) recibe ao inicio de curso ao estudiantado internacional que chega á institución. Esta oitava edición reuniu a preto de 300 estudantes procedentes de 60 países.
A xornada, organizada pola Vicerreitoría de Ordenación Académica e Oferta Formativa, estivo presidida pola rectora Rosa M. Crujeiras. Tamén participaron a tenente de alcaldesa do Concello de Santiago de Compostela, María Rozas Pérez, e a presidenta en Santiago da asociación de estudantes internacionais Erasmus Student Network (ESN), Iria Conde Franco.
Tras a benvida institucional, o programa planteouse como un espazo de convivencia e de achegamento á cultura galega. A Orquestra Universitaria puxo música ao encontro e o Espazo de Danza USC ofreceu unha mostra de baile tradicional galego.
Nesta edición, as comunidades participantes máis numerosas son a mexicana, a italiana, a polaca e a colombiana. Os estudantes que participan na xornada proceden de programas diversos como mestrado, doutoramento, mobilidade e visitantes. Como parte do compromiso social da USC, tamén participan estudantes de programas de cooperación como Fundación Carolina, MAEC-AECID (Ministerio de Asuntos Exteriores, Unión Europea e Cooperación – Axencia Española de Cooperación Internacional para o Desenvolvemento), AUIP (Asociación Universitaria Iberoamericana de Posgrao) e o Programa de axudas para persoas procedentes de zonas en conflicto, unha iniciativa específica promovida pola propia USC.
O obxectivo do encontro é facilitar os primeiros contactos entre estudantes de distintas nacionalidades e favorecer a súa integración na vida universitaria e na cultura galega. Con esta edición, o International Students Welcome Day consolídase como un espazo de encontro nunha comunidade académica cada vez máis internacional.
O Campus de Lugo estrea o seu propio Welcome Day
A oitava edición incorpora unha novidade: o Campus de Lugo contará este curso cun evento propio. A cita terá lugar o sábado 3 de outubro e trasladará a Lugo o espírito da iniciativa, cun programa específico de acollida.
Segundo a USC, a celebración nos dous campus permitirá achegar esta experiencia de benvida ao conxunto do estudiantado internacional da institución e reforzar a súa integración desde o inicio do curso 2026/27.
