20% dos pisos do Sagrado Corazón serán sociais; o resto, para rendas medias

O plan da Xunta para urbanizar 12.000 metros de solo do Sagrado Corazón que agora están a monte e construír 1.265 vivendas a partir de 2028 está a atopar contestación veciñal, sobre todo do contorno, porque, máis aló de que consideren desproporcionada a urbanización e crean que os servizos da zona non están preparados para recibir a esa poboación, temen o perfil desta.

A razón é que a Xunta explicou que o 80% dos pisos serán de promoción pública, unha definición que ás veces se asimila coas coñecidas como vivendas sociais, destinadas a persoas de rendas moi baixas que, en ocasións, teñen asociadas outro tipo de problemáticas. Non obstante, dese 80%, ese tipo de vivenda protexida de promoción pública alcanzará o 20%. O resto (60%) será vivenda de protección autonómica, que tamén terá prezos de venda tasados e requisitos de acceso vinculados á renda.

Con todo, para estas, a renda mínima que se esixe para os candidatos é bastante superior. «Poderán acceder persoas que teñan ingresos ata 6,5 veces IPREM, que para unha familia de tres membros son algo máis de 68.000 euros anuais», explica a Consellería de Vivenda.

O IPREM é un indicador de renda que está fixado en 8.400 euros anuais. O ano pasado, a Xunta modificou os límites e os tramos do IPREM, debido ao aumento do salario mínimo, para favorecer o acceso de máis persoas a este tipo de vivendas.

Ademais dese 80% de vivenda cuxo prezo e acceso estarán regulados, haberá un 20% de vivenda libre.

O proxecto de interese autonómico (PAI) do Sagrado Corazón é un dos que a Xunta ten en marcha en case unha ducia de cidades e localidades galegas para axilizar a construción de vivenda, dada a escaseza e a carestía que hai desta.

A Xunta proxecta a urbanización do solo e expropríao para despois sacalo a subasta entre promotores e construtores. É unha figura nova e máis áxil, que ademais se completou con outras, como a regulación para poder aumentar a proporción de vivenda protexida.

O PAI de Lugo é o máis avanzado. Aprobouse de xeito inicial e expuxéronse ao público as alegacións. Recibíronse 32, 28 a título individual e catro de entidades, como Adega, a asociación Gatos Roxos e a federación veciñal Lucus Augusti. Temen o impacto urbanístico e social dada a dimensión do proxecto. Tamén o Concello pide cambios, como que a Xunta renuncie a ese incremento da edificabilidade, o que suporía entre 150 e 200 vivendas menos.

A Xunta apostou nesta lexislatura por construír miles de vivendas en Galicia e buscou bolsas de solo nas cidades. En Lugo fíxose da man do Concello, primeiro con Paula Alvarellos como alcaldesa e despois con Miguel Fernández e o seu equipo. Este ve a iniciativa da Xunta «coherente» co plan de vivenda municipal, pero pide que se atenda á edificabilidade que o PXOM recolle para esta zona, que reforce a rede viaria e que reubique as zonas verdes.

O sector a urbanizar atópase nunha zona próxima aos polígonos industriais, ao HULA, á intermodal e a vías de comunicación. É unha zona envellecida e con poucos servizos.